Aizawl leh a chhehvel kawng kama ei-in zuarte tan training buatsaih

Health & family Welfare department-a Food and Drugs Administration (FDA), Nestle India leh NASVI (National Association of Street Vendors of India) te chuan nimin khan Youth Recreation Centre-ah 'Project Serve Safe Food Training' an buatsaih a, Aizawl leh a chhehvela kawng kama ei leh in zuartu (street food vendor) mi 100 hnenah thil pawimawhte zirtir a ni.

Training hi Food Safety commissioner K Lalrinzuali'n a hmanpui a; thu sawiin, ei leh in thianghlim leh him mipuiin an ei theih nan kawng kama ei leh in tur zuartute an pawimawh thu a sawi a, an puala zirhona buatsaih chu hmang ṭangkai ngei turin street food vendor-te a chah.

FDA joint director F Lalliantluanga pawhin thu sawiin, "Tui taka ei leh in siam thiam nih mai hi a tâwk lo a, a eitu mipui hriselna atana him leh ṭha, entawn tlaka siam thiam nih a pawimawh. Hemi kawnga nasa zawka ṭan lak hi kan tihmâkmawh a ni," a ti.

Training hawnnaah hian Nestle India corporate affairs manager Sanjay Simon Sen leh NASVI head Sangeeta Sing te pawhin thu an sawi bawk.

Nestle India leh NASVI te hian kum 2016 khan street food vendor-te mumal zawka zirtir turin thawhhona an duang a; training an buatsaih paltlangte chu FSSAI aṭangin FoSTaC (Food Safety Training and Certification) certificate pek ṭhin an ni. State tina Food Safety department nena ṭanghoin training an buatsaih ṭhin a; street food vendor mi 92,862 hnenah training an pe tawh a ni.