World Homoeopathy Day hman a ni

Health & Family Welfare (HFW) department hnuaia Directorate of AYUSH chuan nimin khan Chanmari YMA Hall-ah World Homoeopathy Day an hmang a; khuallian HFW secretary K Lalrinzuali chuan, Mizoramah homoeopathy graduate mi 270 vel an awm thu a sawi.

World Homoeopathy Day hi homoeopathy dintu Dr Christian Friedrich Samuel Hahnemann pian champha April 10-ah hman ṭhin a ni a; kumin Day thupui chu India ramah 'Homoeopathy for Sustainable Health' tih niin, khawvel huapa thupui chu 'Harmony through Homoeopathy – Healing Beyond Borders' tih a ni.

HFW Secretary chuan, homoeopathy chu Germany-a piang chhuak ni mah se, India ramah a lâr ber bakah, khawvela homoeopathy thiam (homoeopaths) ngah ber a nih thu a sawi a, "Mizoramah hian AYUSH inenkawlna kawng hrang hrangte hi mipuiin kan pawm chho zel a, heng inenkawlnate hi natna laka kan inven nan te, taksa hriselna tihchak nan leh natna benvawn hrang hrangte him taka enkawl nan a ṭangkai hle a, a man pawh a tlawm em em a ni," a ti.

Sorkarin AYUSH hi tichak zel tih sawiin K Lalrinzuali chuan, "Mizoramah homoeopathy-in hmasawnna a hmu zel a, tunah hian Mizoramah homoeopathy graduate mi 270 vel an awm tawh a, chu'ng zinga mi pakua phei chuan post-graduate degree an nei tawh," a ti a; mithiamte leh zirlaite chu research lamah uar zawka hma la turin a chah.

Health Secretary chuan, Mizoram sorkarin Ministry of AYUSH hmathlir nena inmilin homoeopathy a kal theih nan hma a lak zel dawn thu sawiin, "AYUSH system hi state chhung hmun tinah thlengin, mipuiin tlawm zawk leh ṭha zawka hriselna an neih nan theihtawp chhuah a ṭul a, mipuite'n AYUSH hnuaia inenkawlna awmte an hlâwkpui ngei ka beisei," a ti a; homoeopathy doctor-te chu an thawhna hmun ṭheuhah mi khawngaihna leh hriatthiamna nena thawk turin a ngen.

Homoeopathy Day hmannaah hian khualzahawm HFW principal director Dr Lalthlengliani pawhin thu a sawi a; AYUSH assistant director Dr Lalkhawngaihi Renthlei leh programme officer Dr Rebecca Lalnunmawii te pawhin thu an sawi. Siaha District Hospital-a medical officer (AYUSH) Dr Ruthi Laldingpuii'n homoeopathy chungchang a sawifiah a, Keifang AHWC-a medical officer (AYUSH) Dr H Lalsangliana'n case presentation a nei. Homoeopathy Day puala flyer insiamsiak lawmman sem a ni bawk.