KHAWTHLIR

Thisen pe

RIPANS zirlaite chuan nimin khan Civil Hospital, Aizawl tan thisen unit 131 an pe a, petute hmeichhia 73 leh mipa 58 an ni. March 30, 1995-a din RIPANS-ah hian hmarchhak state pariat bakah, Jammu & Kashmir aṭangin zirlai 1,037 an awm mek a ni.

Chhiarpuiah inziak lut turin ngen

Chhiarpui 2027 neih mekah a thawh khatna atan in tin chhiar (house listing) neih hmasak a ni dawn a; mahnia inziah luhna (self enumeration) online portal-ah hun tiam April 15, 2026 ral hmaa inziak lut ṭheuh tuin sorkar chuan mi tin a ngen. Self enumeration hi se.census.gov.in kaltlangin tih theih a ni.

Kawng khâr dawn

Traffic SP C Vanlalvena chuan, Chhinga Venga Liandenga Point Junction leh Bazar Bungkawn inkar kawng, Saron Veng kawng chho siam a nih dawn avangin vawiin April 11 chhun dar 11 aṭanga April 13, 2026 zing dar 5 inkarah kawng khâr a nih dawn thu a tarlang.

Pistol man

Assam Rifles chuan April 8, 2026 khan Hmuifangah pistol pakhat, nagazine pakhat leh a mû pasarih an man. Pistol man hi Italy siam Beretta 0.22 mm a ni a, a neitua puh Ngurdingliana pawh manin, Sialsuk Police Station-ah an hlan.

Harsatna awm lo

Mamit Bawrhsap chuan thupek chhuahin, Mamit district-ah eirawngbawlna gas leh tuialhtheiah harsatna a awm rih loh thu a tarlang. DC hian social media-a thu dik lo sawite âwih mai lo tur leh harsatna an tâwk a nih chuan thuneitute hnenah hriattir vat turin mipui a ngen a; delivery authentication code (DAC) chungchanga harsatna awmte chu thuneitu sang zawk hnenah thlen zel a nih thu a tarlang bawk.

Kuhva phurh khap

Hnahthial district magistrate K Vanlalruati chuan thupek chhuahin, Hnahthial district-ah dan loa kuhva rah ro lak luh leh phurh phal a nih loh thu a tarlang a, "Thupek zâwm lote chu BNS 2023 Section 223 hmangin hrem theih a ni," a ti.

NCC cadet camp

2 Mizo Bn. NCC chuan Lunglei Luangmuala 2nd Mizoram Armed Police complex-ah April 6, 2026 aṭang khan NCC cadet-te tan Combined Annual Training Camp an buatsaih a, April 15, 2026 thleng a awh dawn. Camp-ah hian junior division, junior wing, senior division leh senior wing cadet 241 an tel a, an zinga a zatve vel chu hmeichhia an ni.

AMVCA emblem

All Mizoram Village Council Association (AMVCA) emblem thar chu nimin khan Local Administration Department director Dr Lalngura Tlau-in a tlangzarh. AMVCA emblem hi V Lalnunsanga, Graphic ART design a ni.

Mamit DIET tlawh

SCERT director Caroline Zoramthangi chuan nimin khan Mamit DIET a tlawh a, principal leh thawktute nen an inkâwm. Director chuan, ṭhahnemngai taka zirlaite hmakhua thlir chunga hna thawk tur leh taima taka an zirlai zir turin Mamit DIET-a thawkte leh zirlaite a chah. Director hian Centre of Excellence hnuaia DIET Mamit building sak mek a en bawk.