Serchhip dist-a hna thawh tur sawiho

Serchhip District Government Land Authority chu an chairman Paul L Khuma, district bawrhsap kaihhruaiin nimin khan an ṭhu a; Thenzawl Peace City (Greenfield Project) hmalakna kal zela sorkar ram hman dan tur leh district chhunga hmasawnna hna hrang hrang thawh dante an sawiho.

Ṭhutkhawmah hian Thenzawl Peace City hmalakna hnuaia Dilpui huam chhunga AH&Vety department ram acre 140-a zau, ran chaw chinna hmun leh hnathawktute hmunhma (residential quarters) te chu UDPA department-in hmasawnna hna an thawhna atana hman tura ruahman a nih thu tarlan a ni. He hmun hi Neihloh khuaa sawn tura rel tawh a nih laiin, AH&Vety department hotute chuan Neihloh chu khawl hmanga huan leh rante enkawlna (mechanized farming) kalpuina atan chuan hmun remchang nia an hriat loh thu an sawi avangin thuneitu sang zawkte nen ngaihtuah ṭhat leh turin an rel.

Serchhipa Women & Child Development pisa sakna atana P&E Venga Land Resources, Soil & Water Conservation department ram chu chiang zawka ennawn leh an rêl a; Leisang kawia anganwadi centre chu nunau leh naupangte tan a him tawk loh avangin AOC Venga Land Resources, Soil & Water Conservation department ramah sawn tura ruahman a ni bawk.