Tuihna humhalhah theihtawp chhuah turin PHE Minister-in YMA-te a chah

Zawlbuk Group YMA chuan nimin khan Seling YMA Rûnah inkhawmpui vawi 45-na an hmang a; minister of state Prof. Lalnilawma, bialtu MLA-in a hmanpui a, tuihna humhalhah theihtawp chhuah turin YMA-te a chah.

Prof. Lalnilawma chuan, tuihna humhalhah theihtawp chhuah a ngaih thu sawiin, "Kan tuihnate a kum têla a tlem zel avangin YMA ang pawha theihtawp kan chhuah zel a ṭul," a ti a; mimal ṭhahnemngaihna ang pawha tuihna humhalhna leh tuihna siam belh theihna kawngah theihtawp chhuah a ṭul thu a sawi.

Zawlbuk Group YMA chhunga khaw hrang hrangte'n tui leh kawlpetha an hnianghnar theih nan sorkarin hma a lak thu sawiin Minister chuan, "Vawmhraw tui lakna tur project pawm a ni tawh a, Thingsulthliah, Tlangnuam leh Seling mipuiin tui hnianghnar tak an neihna tur a ni. Zawlbuk Group YMA huam chhunga khuate'n kawlphetha ṭha zawk an neih theih nan Thingsulthliah Power & Electricity Sub-Station tihchangtlunna tur project pawm a ni," a ti.

Prof. Lalnilawma chuan, YMA-in ruihhlo do beihpui a thlak tur chu a pawimawh thu a sawi a; fimkhur tak chunga theihtawp chhuah tur leh ram leh hnam damna tur a ni tih hre reng chunga Pathian ráwn chunga ke pên turin a sawm.

Zawlbuk Group YMA huam chhungah hian YMA branch 24 awmin, member 11,690 an awm mek a; YMA group lian ber a ni.