Dr R Lalthangliana'n World Bank, UNAIDS leh sorkar laipui hotute a kawm

Minister Dr R Lalthangliana chuan February 14, Zirtawp zing khan New Delhi-a World Bank, UNAIDS leh sorkar laipui hotute a kawm a, World Bank official-te chu January 7, 2020 a World Bank headquarters, USA-a a thu thlente a sawipui.

January 7, 2020-a World Bank chief manager Trina Haque leh official dangte nen USA-a an inkawmnaah Dr R Lalthangliana chuan, Health department hmalak zelna tura Mizoram sorkar leh central sorkar kaltlanga Preliminary Project Proposals tihhlawhtlin a nih theih nana hma la turin a thlen a ni.

Dr R Lalthangliana hian UNAIDS country director Bilali Camara leh officials dangte pawh an pisaah a kawm a, January, 2020-a USA-a UN­AIDS International office hotute nena an lo inhmuhtawhna chung­changah hmalak chhunzawm zel dan tur an sawiho a, UNAIDS hotute chuan US sorkarah an thlen tawh thu an lo hrilh. Mizoram a HIV/AIDS dona leh tihtlemna kawnga thawhho dan tur kawng hrang hrang an sawiho bawk.

Ministry of Tribal Affairs-a joint secretary panih Naval Jit Kapoor leh MS Tshering pawh kawmin Dr R Lalthangliana hian Zoram Medical College-a mipa leh hmeichhe hostel sakna tur chungchang te, special central assistance to tribal sub-scheme hnuaia Mizoramin project a hmuh theih dan tur leh Ministry of Tribal Afairs hnuaia schemes hrang hrang awm te ṭangkai taka hman theih dan tur an lo kawhhmuh a ni.

Ministry of Health & Fami­ly Welfare secretary Preeti Sudan hnenah Health Minister chuan Mizorama RIPANS tihchangtlunna tur atana February, 2019 a cheng vbc 480 sanction awm tawh, hmalakna la awm si lo chu a ngaimawh thu a thlen. Health Secretary chuan RIPANS i/c Jt.Secretary leh Spl.Secretary-te chu a rang thei ang bera hma la turin a hrilh nghal.

Higher & Technical Educa­tion changtu Dr R Lalthang­liana hian Ministry of HRD joint secretary (RUSA) Kamini Chauhan Ratan chu RUSA-2 hnuaia hmalakna chi hrang hrangte a sawipui. Kamini Chauhan Ratan hian RUSA-2 chu March 31, 2021 thleng pawhsei a nih thu Dr Thangtea hi a hrilh a, order copy a pe nghal.

Dr R Lalthangliana hian Kamini Chauhan Ratan hnenah hian kumin chhung ngeia state minister zawng zawng kokhawma RUSA review meeting buatsaih nise a duh thu a thlen.

Ministry of HRD joint secretary (HE-Univ.) GS Hosur pawh hmuin Dr R Lalthang­liana hian Mizoram University Southern Campus hmun tur zawn mek anih thu a hrilh, GS Hosur chuan campus hmun tur hmuh anih veleh a campus dinna (building infrastructure) atana sum mamawh te ministry-in a pek theih an inbeisei thu a sawi.

Dr R Lalthangliana hian Niti Aayog member Dr Vinod K Paul pawh kawmin, Mizoramin health sector lama hma a sawn theih dan tur a sawipui. Dr Paul chuan Mizoram a Primary Health Care tihchangtlun nana hmalak dan tur hrang hrang Heath Minister hi a hrilh.