Dr Thangtea'n sorkar laipui hotute a kâwm
Health minister Dr R Lalthangliana chuan December 17, Thawhlehni khan Union Tribal Affairs secretary Deepak Khandekar, Micro, Small & Medium Enterprises secretary Dr Arun Kumar Panda, DoNER secretary Dr Inderjit Singh, Union Ayush secretary Vaidya Rajesh Kotecha leh Ayush Ministry-a hotu dangte a hmu a; Mizoram mamawh thil hrang hrang a sawipui.
Tribal Affairs Secretary hnenah Dr R Lalthangliana chuan Zoram Medical College-a mipa leh hmeichhe hostel sakna tur ruahmanna te, primary health centre leh sub-centre tihchangtlunna tur sum ruahman ṭhin a beitham thu te, Mizoramin Health & Wellness Centre atana sum tlem tê tê a hmuh ṭhin chu tipung tura a duh thute a thlen.
Deepak Khandekar chuan, Health Minister thu thlenah ruahmanna siam nghal tur leh ngaihtuah nghal a nih tur thu a lo hrilh a; sorkar college hrang hranga hostel mamawh sakna tur te, multipurpose hall sakna turte ruahmanna siama thehlut turin a lo chah a ni.
Ayush secretary Vaidya Rajesh Kotecha nen an inkawmnaah Mizorama Ayush Hospital dinna tura ruahmanna thehluh tawh chungchang a sawipui a; Ayush doctor eng emaw zat pe tur te, ramhmul damdawi leh thil danga hmalaknate a sawipui bawk.
Dr R Lalthangliana chuan Micro, Small & Medium Enterprises secretary Dr Arun Kumar Panda a hmuhnaah, Mizorama district pasariha ṭhalai lehkhathiam leh thiamna bik neite tan common facility centre din theih dan tur a sawipui a; MSME hnuaiah chhungkua leh mimal tana eizawnna ngêlnghet neih theihna tur scheme chi hrang hrangah Mizoram tana theihtawp chhuaha hmalakpui turin a ngen. Arun Kumar Panda chuan, kum thar January thla tàwp lamah Mizoramah kal a tum thu sawiin, hmalak dan tur sawiho a duh thu a lo hrilh.
DoNER secretary Dr Inderjit Singh chu Dr R Lalthangliana chuan Health & Family Welfare leh Higher &Technical Education department aṭanga project Mizoram sorkarin a thehluh tawhte a sawipui a ni.