Tlangsamah Territorial Army a awm theih nan hma la mek

Mizoram Ex-Service League (MESL) Sub-headquarters, Champhai chuan nimin khan Champhaia Thangtea Hall-ah Assembly vawi 19-na an hmang a; khuallian Lt Col. Clement Lalhmingthanga, Champhai South bialtu MLA leh Mizoram Ex-Service League president chuan,Champhai Tlangsamah Territorial Army an awm theih nan hmalak mek a nih thu a sawi.

Lt. Col Clement Lalhmingthanga chuan, sipai bángte chu Mizoram tana mi hlu tak tak an nih thu a sawi a, "India Danpuia a inziah angin sipai nihna reng reng (rank) chu hminga bet reng tura phalsak a ni a, hei hian an hnathawh ropuizia leh hlutzia a tilang. Agniveer sipaia luh theihna tura pre-recruitment training ṭhalaite tan buatsaih tum a ni a, Tlangsamah Territorial Army awm theih nan hmalakna a kal mek zel," a ti.

Inkhawmpui hi honorary captain C Rohmingliana'n a kaihruai a; district bawrhsap Mohammad Aaquib pawhin thu a sawi. MESL Sub-headquarters, Champhai hi Mizoram Ex-Service Association anga din hmasak a ni a, June 14, 1996 aṭangin MESL hnuaia sub-headquarters niin, unit pariat an awm mek a ni.