Drug Free District Campaign hawng

Lai Autonomous District Council (LADC) chief executive member (CEM) C Lalsawmzuala chuan nimin khan Lawngtlai DC conference hall-ah Nasha Mukt Bharat Abhiyan hnuaia Lawngtlai district-a ruihhlo do beihpui thlakna, Drug Free District Campaign a hawng.

C Lalsawmzuala chuan, Lawngtlai district chu international border-a awm a nih angin ruihhlo luh theihna a tam thu a sawi a, "Ruihhlo do kawngah pawh chak leh uar zawka hnathawh a ṭul. Ruihhlo awm lohna district-a inpuan hi thil awlsam a ni dawn lo a, sorkar, VC, NGO, kohhran leh mipui ṭan tlanna leh thawhhona ṭha a ngai dawn," a ti a; theihtawp chhuaha thawkho turin district mipui a sáwm.

Drug Free Campaign hi Nasha Mukt Bharat Abhiyan hnuaia kalpui tur a ni a, a tum ber chu ruihhlo hmansual leh tawlhruk awm lohnaa Lawngtlai district siam a ni. LADC huam chhunga khaw 99 leh CADC huam chhunga khaw 88-ah kum thum chhung kalpui tura duan a ni a, a ṭul anga pawhsei theih a ni.

Drug Free District Campaign hawnnaah hian Lawngtlai bawrhsap Donny Lalruatsanga leh SP PC Lalchunglura te pawhin thu an sawi.