PWD, Biate Sub-Division pisa hawng

Public Works Department (PWD) minister Vanlalhlana chuan April 9, Ningani khan PWD, Biate Sub-Division pisa a hawng a; Arṭahkawn leh Biate inkar kawng chu cheng vbc 15 hmanga siam a nih dawn thu a sawi.

PWD, Biate Sub-Division hian kawngpui hrang hrang - Chalráng-Biate, Khawhai-Tlangpui, Tlangpui-Lungva, Chalráng-Vantlang, Khawhai-Lungtan, Chalráng-Riangtlei, Biate-East Lungdar, Biate-Tuipui leh Biate-Bungzung inkar kawngte an enkawl dawn a ni.

Vanlalhlana chuan, SASCI hnuaiah Biate leh a chhehvel khuate tan kawngpui ṭha siam turin hmalak mek a nih thu sawiin, "Cheng vbc 15 sengin Arṭahkawn leh Biate inkar kawngpui siamṭhat a ni dawn a, Central Road Infrastructure Fund aṭanga dawn cheng vbc 10 sêngin Tuipui kawng siamṭhat a ni dawn," a ti.

Thenzawlah PWD division thar din a nih thu sawiin Minister chuan, "Tunah hian Biateah dub-division din leh a ni bawk a, hengte hi khawtlang mipuite'n an chhawr ṭangkai ngei ka beisei," a ti a; neitu rilru pu chunga sorkar nen ṭha taka thawkho turin mipui a chah.

PWD Sub-Division hawnnaah hian MLA pahnih Lalmuanpuia Punte leh T Lalhlimpuia bakah, PWD chief engineer (Roads) David Sapzova te pawhin thu an sawi a; PWD officer-te leh Biate khawtlang hruaitute an tel.