PWD Minister-in kawng siam tur a enfiah

PWD minister Vanlalhlana chuan nimin khan Vangchhia, Leithûm, Dungtlang, Khawbung leh Farkawn khuaa kawngpui thawm ṭhat turte a enfiah a; khawtlanga hmasawnna rahbi thar kai turin khawtlang hruaitu te, tlawmngai pawl leh sorkar hnathawkte lungrual taka an ṭanho a ṭul thu a sawi.

Vanlalhlana hian Farkawn khawtlang hruaitute a kâwm a, "Sorkarin sum tam tak sêngin hmasawnna hna thawk ṭhin mah se, a hmun ngeia mipuite'n neitu rilru pu chunga an thlâwpa an vil ve loh chuan hmasawnna a tlo thei lo. Khawtlanga hmasawnna rahbi thar kai tur chuan khawtlang hruaitu te, tlawmngai pawl leh sorkar hnathawkte lungrual taka an ṭanrual a ngai a ni," a ti.