Aizawlah Winter Festival

Tourism department chuan nimin khan Lammualah Winter Festival 2019 an huaihawt a, deputy chief minister Tawnluia'n a hawng.

Dy. Chief Minister chuan, Winter Festival chu Mizo sakhuana nen inmila ruahman a ni tih sawiin, "Mizoram hi khualzin tam zawkin an tlawh theih turin sorkarin hma a la a, mipui pawhin páwn lam aṭanga Mizoram tlawhtu khualzinte ṭha taka lo dawngsawng ṭhin turin kan rilru leh nunphung kan buatsaih a pawimawh," a ti a; sorkarin ṭhalaite hmasawnna turin policy mumal tak neiin, ruahmanna a siam thu leh eizawnna ṭha leh rintlak siam turin theihtawp a chhuah mek thu a sawi.

Khualzahawm Robert Romawia Royte, Tourism minister chuan, Winter Festival chu Krismas lam hawia mipuite thinlung buatsaihna atan buatsaih a nih thu sawiin, "Kan hma lawka Lal Isua pian champha lo thleng tur kan lawmna turah hnam dang leh ram dang mite híp leh hman ve châkawm khawpa hun hman a ṭul. Winter Festival hi kum dangah pawh uar tak leh inbuatsaihna ṭha zawk nen hman zel tum a ni," a ti. Winter Festival-ah hian hnam lâm leh Mizo nunphung lantir theihte entir a nih bakah zaithiamte an zai a; food stall 12, handloom & handicraft stall pathum leh carnival stall 18 hawn a ni.