KHAWTHLIR

Information & Public Relations department chuan thuchhuah siamin, Mizoram Calendar 2020 leh Mizoram Diary 2020 chu Kolkata aṭangin Mizoram pana phurh mek a nih rualin, tunlai ram chhunga buaina avangin a phurtute kawng lakah an tangkhang rih tih an tarlang a, "Krismas hmain a lo thlen hman beisei a ni a, mipui hriatthiamna kan ngen e," an ti.

Mizoram Pradesh Youth Congress Committee (MPYCC) chuan nimin khan Aizawl Civil Hospital, Synod Hospital, Christian Hospital, Serkawn; State Cancer Institute, Adventist Hospital, Aizawl; Lairam Christian Medical Centre, Lawngtlai Rs.10000, Evangelical Church of Maraland Nursing Home, Siaha hnenah Rs. 10,000 ṭheuh leh Salvation Army Motherless Baby Home, Bethany Children's Home, Audrene Scism Children  Home, leh Bethany Health Centre hnenah Rs. 5,000 ṭheuh an hlan.

Mizoram University-a Botany department leh Mizoram sorkara Horticulture department chuan nimin khan MZU-ah 'IPR and plant protection with special reference to NE India' tih thupui zirhona an buatsaih. Mizoram sorkara MISTIC leh Horticulture department-a mithiamte leh MZU-a professor-te'n thupui hrang hrang an sawi.

ZIDCO chuan nimin khan TNT, Zuangtui hnenah Krismas thilpek atan buhfai ip 20 an pe a, December 17 khan Ṭawngṭai Bethel Camping Centre hnenah buhfai ip 20 an pe tawh bawk.

Mizoram Chanchinbu Sem Association chuan tun hnai khan kum 2020-2022 chhunga an pawl office bearer turte an thlang a; president atan PB Shiana (Kulikawn), vice president atan Dosanga (Khatla), general secretary atan Lawmsanga (Bungkawn), assistant secretary atan Lalfakawma (Ramhlun South), treasurer atan Lalnguri (Chaltlang) leh finance secretary atan Lalhuzaua (Kulikawn East)-te an thlang a ni.