State pali foundation day lawm a ni; 'State tinin danglamna kan nei' - Larsap
Governor Gen. Dr Vijay Kumar Singh hoin April 10, 2026 khan Lok Bhavan-ah 'Ek Bharat Shreshtha Bharat' hmalakna hnuaiah Bihar, Rajasthan, Odisha leh Himachal Pradesh te state puitlinga hlànkai an nih champha lawm a ni.
Foundation day lawmna inkhawm hi Governor additional PS Lalhruaitluangi'n a kaihruai a; Bihar, Rajasthan, Odisha leh Himachal Pradesh governor-te thuchah ngaihthlak a ni. Mizoram University, National Institute of Technology, Mizoram leh Mizoram Law College zirlaite'n hnam lâm leh zai an entir.
Mizoram University pro vice chancellor Prof. Pravakar Rath (Odisha), NIT, Mizorama assistant professor pahnih Dr Saurav Suman (Bihar) leh Dr Nidhi Yadav (Rajasthan) leh, College of Veterinary Sciences & Animal Husbandry, Mizorama zirlai Sonali (Himachal Pradesh) ten an state chanchin an sawi bawk.
Larsap Gen. VK Singh chuan, state tinin danglamna bik an nei ṭheuh tih a sawi a, "State/union territory-te din champha kan inlawmsak tawn ṭhin hmang hian mi dangte hnam ziarâng, nunphung leh tih dante kan hriat thûk lehzual phah a, hei hian inpumkhatna siamin, India chu ram danglam bik a nihzia a lantir a ni," a ti.
Gen. VK Singh chuan, "Danglamna nasa tak kara kan inpumkhat tlatna hi kum 2047-a ram changkang leh intodelh, Viksit Bharat ni tura India siamna atana hmanraw pawimawh tak a ni," a ti a; Ek Bharat Shreshtha Bharat hnuaia state pali din champha lawmna a hlawhtlin theihna tura tha thawhtu zawng zawngte chhuanawm a tih thu a sawi.
March 22, 1912 khan Bengal Presidency aṭangin Bihar a piang a, March 30, 1949 khan Jodhpur, Jaipur, Bikaner leh Jaisalmer lalramte inzawm khawmin Rajasthan siamin, Greater Rajasthan tia vuah a ni. Odisha chu tun hma chuan Bihar hnuaiah awmin, April 1, 1936 khan state puitlingah hlankai a ni a, ṭawng hman behchhana India rama state piang hmasa ber a ni. April 15, 1948 khan Himachal Pradesh chu Indian Union hnuaia Part C State ni turin a piang a, January 25, 1971 khan state puitlinga hlankai a ni.