MZU-ah CAA duh lohna lantir Bangalore leh Champhaiah CAA dona

Citizenship (Amendment) Act, 2019 (CAA) duh lohna lantir Mizo zingah an awm belh zel. Nimin khan Mizoram University-ah CAA duh lohna an lantir a, Thawhlehni khan Bangalore-a awm Mizote'n CAA dodalna an lantir bakah, Cham­phaiah ṭhalaite'n an lantir bawk. 

Mizoram University Students Council chuan nimin khan MZU campus-a MZU Park-ah Citizenship (Amendment) Act duh loh lantirna leh  Jamia Millia Islamia University, Delhi-a zirlaite chunga police chêt dan an demzia lantirna atan pun­khawm an huaihawt.

MZU Park-a CAA duh lohna lantirna hi MZU pumpui huap a ni a, zirlaite leh zirtirtu bakah, thawktu dang mi ṭhahnem tak an tel a; CAA an duh lohna leh CAA duh lohna lantirtu Jamia Millia Islamia University zirlaite chunga Delhi police chet dan an demna thu ziak eng emaw zat an keng a ni. 

Mizo Students' Association (MSA), Bangalore huaihawtin Bangalore khawpuia Mizote chuan Decembert 17, Thawh­lehni khan Mizoram House kawtah CAA duh lohna an lantir a, Bangalore Mizo Association-in an thláwp a ni.

Bangalore-a punkhawmnaah hian zirlaite leh nu leh pa mi 300 vel an tel a, hnam dang tel an awm bawk. CAA duh lohna hi tharum thawhna tel loin, boruak muanawm tak hnuaiah lantir a nih thu, Bangalore aṭanga thu dawnna chuan Vanglaini a hrilh.

Bangalore-a Mizote'n CAA duh lohna an lantir zawh hnuah, an ṭìn darth vek hmain Mizo ṭhenkhat chu hnam dang mipa pakhatin a tibuai a, buaina leh harsatna lian zawk erawh a chhuak lo.Hemi chungchangah hian Bangalore-a Mizote chuan, mipa pakhat hian buaina siam a tum lui viau a, mahse, intihbuai loh an duh avangin Mizote chu chháng lêt lo turin an inngen a, buaina lian zawk chhuak loin an ṭin darh thei tih an sawi.

December 17, Thawhlehni khan Zoram Revolutionary Movement (ZRM) chuan Cham­phai Vengthlangah CAA duh lohna an lantir bawk a; ṭhalai ṭha­hnem tak kal khawmin, CAA an duh lohzia leh CAA thláwptu MNF party leh Mizoram Lok Sabha MP an demzia an auchhuahpui a ni.