Mipui tam zawk ban phâka MUHCS siam turin MTM-in Mizoram sorkar ngen

Mizoram Transformation Movement (MTM) chuan thuchhuah siamin, Mizoram Universal Healthcare Scheme (MUHCS) chu mipui tam zawk ban phâka siam tur leh, MUHCS zawm lo damdawi-ina inenkawlte medical re-imbursement-ah inenkawl senso zatve tal hmuh lêt a nih theiha siam turin sorkar an ngen.

MTM chuan, Mizoram sorkarin MUHCS a siam leh mi tam takin an hmang ṭangkai tawh chu ṭha an tih thu an sawi rualin, "Healthcare scheme hi mipui tam zawk tan ban phâka a awm theihna turin harsatna la awmte a rang thei ang bera chingfel turin sorkar kan ngen a ni," an ti.

Rîkrum thila damlo, MUHCS zawm lo mimal damdawi-ina enkawlte'n inenkawlna senso an hmuh lêt theih a tlem hle tih sawiin MTM chuan, "Hmun thuma ṭhena hmun khat pawh a bill theih mang loh. Emergency-a non-empanelled hospital-a luh ngaite'n an bill aṭanga a zatve tal an hmuh lêt leh theihna turin sorkar hian hma la rawh se," an ti a; bill theih tlem lutuk ennawn turin sorkar an phût.

MTM chuan, Mizoram mipuiin sorkar damdawi-inte an inchan loh nasat thu leh zai ngaite'n thla hnih chuang te an nghah a ngai thu sawiin, "Mizorama private hospital empanelled lohah damlo an luhin bill theih loa a awm hi a dik lo," an ti a; state páwna damdawi-in ṭhenkhat deemed hospital-a pawm an nih thu sawiin, "Hnam dang private hospital-a tih theih si, Mizoram entreprenuer-te'n an siam private hospital-a phal a ni ve loh hi a dik lo hlein kan hria a, sorkar hian rang takin ngaihtuah ṭha leh se kan duh," an ti.

MLA-te leh MLA hluite'n MUCHS-ah sum thawh ve mah se, an zawm ve lo tih sawiin MTM chuan, "Eng hospital-ah pawh, empanel loh hospital-ah pawh lut se, an inenkawlna senso zawng zawng an bill vek thei," an ti a; MUHCS chu a ṭha hlea an hria a nih chuan ram hruaitu MLA leh minister te, ex-MLA te pawhin zawm ngei se an tih thu an sawi.

MTM chuan, sorkar hnathawk pension tawhte chu mipui nawlpui aia MUHCS-a sum thawh tam zawk an nih thu sawiin MTM chuan, pensioner-te lungawi lohna leh MUHCS 1.0 anga dah leh tura an phût chu an thlàwp thu an sawi a; MUHCS-a sorkar hnathawkte dinhmun pawh siamṭhat a ngaia an hriat thu an tarlang bawk.