Kum khat MNF sorkarin beisei a pha lo hle - Congress party
Mizoram Pradesh Congress Committee (MPCC) chuan, MNF kaihhruai sorkarin December 15, 2019 khan kum khat a tling tih tarlangin, kum khat chhunga an thil tih danin mipui beisei a pha lo hle niin an sawi. Nimina MPCC thuchhuah chuan, "Kum khat chhung hian ram tana thil pawimawh, hmasawnna lian tham tih an la nei lo mai a ni lo a, mipui hnena an thutiam tam tak an bawhchhiat nghal avangin beidawnna nen mipuiin MNF sorkar an thlir mek a ni," a ti.
Congress party chuan, "Kum khat chhungin MNF sorkar leh Lok Sabha MP C Lalrosanga ten BJP-in Hindu lal ram dinna atana an ruahman CAB 2019 thláwpin Mizoram leh a chhunga chengte an hralh hman a, CAB duh lohna nasa taka lantirtu Mizoram mipui, NGO-te leh kohhran mipuite an zah lohzia an chêt danin a tarlang zui zel bawk," an ti a; MNF sorkarin Mizoram mipui thinlung an hliam chu a nat em avangin a dam mai mai dawn lo tih an sawi.
Chief minister Zoramthanga chu thu a tiam dan leh a ngaih pawimawh zawng thlengin kum 10 kal ta nen danglamna a la awm lo tih sawiin MPCC chuan, "Kum khat lek chhungin ama thu sawi ngei hmangin nuihzatburah a insiam hman a ni," an ti a; inthlan hmaa mipui hnena cheng nuai thum pek an tiam chu tun thlengin an la tihlawhtling lo a, chutih laiin, SEDP-ah cheng vbc. 750 an dah thu an tarlang.
MPCC chuan, MNF sorkar chu hna thawh aia hming thlaka buai nasaah puhin, "Congress sorkar din Mizoram Institute of Medical Education and Research (MIMER) chu Zoram Medical College tiin a hming an thlak ringawt a, mahse, kum khat chhung hian ZMC tia an thlâk tâk tihhmasawn kawnga an chêtna lian tham hriat tur a awm lo," an ti.
Congress party chuan, tui bill leh electric bill nasa taka a pun laiin, hmasawnna a awm loh thu te, CM Zoramthanga'n 'Aizawl hi traffic jam lohna khawpui awmchhunah kan siam dawn' tia a sawi chu bawhzuina a awm loh thu te, CM-in Chapchar Kut 2019-ah May 2019 hnuah Aizawla Assam Rifles-te sawn chhuah an nih tur thu a sawi laiin, tun thlengin sawn chhuah an la nih loh thute an tarlang bawk.