Oil palm hralh chhuah tur vailiam

Lunglei District Agriculture Office buatsaihin April 11, Inrinni khan Tlabungah oil palm hralh tur vailiam a ni a; kumina Tlabung chhehvela oil palm thar hralh chhuah hmasak ber tur a ni.

Oil palm thawn chhuah hi kg 4,175 niin, chhungkaw pakaw ta a ni a; a vai liamnaah hian Tlabunga oil palm chingtu te, Agriculture & Farmers Welfare department-a thawkte leh partner company Patanjali Foods aiawhte an tel.

Oil palm vailiam zawh hian Tlabung RD block huam chhunga oil palm chin leh hralh chhuah chungchanga hma lak zel dan tur leh hmasawnna tur hrang hrang ruahmannate an sawiho nghal.

Tlabung RD block chhungah oil palm chingtu chhungkaw 80 vel an awm a; Tlabung, Tipperaghat leh Khojoysuri khuaa ram hectare 150 vela zauah oil palm an ching mek a ni.

Agriculture department chuan kut hnathawktute hnenah oil palm ṭiak a sem ṭhin. A chinna senso hrang hrang - a hmun enkawlna, half moon terrace laihna, leilâwn leh a sengna harvesting pole te chu oil palm farmer-te hnenah pek ṭhin a ni.

Oil palm hralhna chungchangah Agriculture department leh Patanjali Foods chu an thawk dun a, Patanjali Foods hian oil palm rah 'Fresh Fruit Bunch' an lei ṭhin. Tun dinhmunah chuan Bukvanneia Godrej Company oil palm mill-ah an hralh chhawng rih.

Lawngtlai district-a Liapha khuaah Patanjali Foods hian oil palm mill an bun mek a, kumin 2026 chhungin hawn theih besei a ni.