PWD Minister-in kawng siam tur a en

PWD minister Vanlalhlana chuan April 11, Inrinni khan Champhai, Mualkawi, Melbûk leh Zokhawthar inkalpawhna kawng siamṭhat tur a hmunah a en a, PWD department hotute'n an ṭawiawm.

Sorkar thuchhuah tarlan danin, highway kawng hluiin a paltlang siamṭhatna tur one time improvement (OTI) atan cheng nuai 985 ruahman a ni a; Champhai Kanan Veng aṭanga New Champhai Zotlang inkar bakah, Mualkawi, Melbuk, leh Zokhawthar khaw chhung kawngte a huam dawn. A tira km 17.45-a thui chu blacktop chhah ṭha tak (BC=40mm) hmanga siam tur a ni a, tender buaipui mek a ni.

Khankawn aṭanga Zokhawthar inkar, double lane highway awm sa enkawl zui (performance based maintenance contract) hna thawhna atan cheng nuai 2,895 ruahman a ni bawk a; he hna atan hian tender chhuah tawh niin, April 30, 2026-ah technical bid hawn a ni ang. Hna thawh tur hian kawng chhe lai hnawh phui (initial rectification), road sign leh protection wall siam, kawng tluana blacktop thar (periodic maintenance) te a huam.

Kawng siam turah hian kawngpui siam ngawr ngawt bakah, kum 5 chhung enkawl zui (routine maintenance) leh leimin thenfai (emergency work) pawh a tel dawn a ni.