NIT-Mizoram harsatna Chief Minister-ah thlen

Science Teachers Association of Mizoram (STAM) hruaitute chuan December 17, Thawhlehni khan chief minister Zoramthanga chu a pisaah an hmu a, National Institute of Technology (NIT) Mizoram harsatnate an thlen.

STAM hruaitute chuan, Lengpui rama NIT-Mizoram campus tur chu notified riverine forest area a nih avangin NIT dinna tura hmalakna kal mekah NIT-in harsatna an tâwk tih CM an hrilh a, "A hmunhma buatsaiha circular road an siam bak chu in sak hna chhunzawm theih lohin tun thlengin a awm a, hmasawnna ṭhuanawp renga a awm hi a pawi hle a ni," an ti a; NIT-Mizoramin harsatna a tawh mekte chinfel a nih theih nan hma la turin CM chu an ngen. NIT-Mizoram Director an duhkhawp loh thu an hrilh bawk.

NIT-Mizoram harsatna an thlen chungchangah hian CM Zoramthanga'n, Riverine Forest Reserve pawh sorkar laipuia Fo­rest Minister-in clearance an pe tawh tih a hrilh thuin a lo chháng tih sawiin STAM hruaitute chuan, "Theihtawp chhuaha hma a lo lak zui tur thu a sawi avangin kan lawm hle. Hun chêp tak karah CM hmuhna hun kan neih theih avangin a chungah kan lawm hle a ni," an ti. STAM hruaitute hian nimin khan NIT-Mizoram chungchangah Principal Chief Conservator of Forest an hmu leh bawk.