AMC inthlan atan home voting ṭan a ni

April 21, 2026-a Aizawl Municipal Corporation (AMC) inthlan turah loh theih lohna avanga in lama vote thlak ngaite kal chilh a, vote thlaktirna, home voting chu nimin khan ṭan a ni.

Home voting hi damlo leh taksaa harsatna nei leh pianphunga rualbanlo, polling station pan thei lote'n an ina vote an thlak theihna tura ruahman a ni a; March 13-16, 2026 chhung kalpui tura ruahman niin, polling official-te'n an inah kal chilhin vote an thlaktir.

Home voting ni hmasa ber nimin khan zing dar 6-ah District Election Officer pisa, Bawrhsap Pisapui aṭangin electronic voting machine (EVM) leh hmanraw dangte chu municipal ward tina municipal returning officer-te'n General Observer hriatpuinain strong room aṭangin an pe chhuak a ni.

Home voting hi AMC ward 19-ah neih a ni a, ward tinah home voting team pakhat ṭheuh an awm. Mi 2,769-in home voting an dil a, Ward II-ah tam berin, diltu mi 209 an awm.

Hriat theih chinah home voting hmanga vote thlak upa ber chu Nghakliani, Dawrpui, Ward IX a ni a, kum 102 a ni.

AMC inthlanpui neih turah hian candidate 68 an awm a; INC, MNF leh ZPM party-te'n ward awm zawng zawng chuhin, candidate 19 ṭheuh an nei a, BJP-in ward 11-ah candidate an nei. Candidate-te chu mipa 41 leh hmeichhia 27 an ni.

Tun ṭum AMC inthlana hman tur electoral roll-ah voter 2,39,989 an awm a; chu'ng zinga 1,29,656 chu hmeichhia niin, 1,10,333 chu mipa an ni a; mipa voter aiin hmeichhe voter 19,323-in an tam zawk.

AMC inthlanah hian April 21, 2026-ah zing dar 7 aṭanga tlai dar 5 thleng vote thlak hun hawn a ni dawn a, vote thlak ṭhat ngai a awm chuan April 23-ah vote thlak ṭhat a ni ang. Vote tlate chu April 27, 2026-ah chhiar tur a ni.