Pre-budget meeting-ah minister Chama

NDMC Convention Centre, New Delhi-ah nimin khan U­nion Finance minister Nirmala Sitharaman hoin 'Pre-Budget Meeting with Finance Ministers of All States and Union Territories (with legislatures)' buatsaih a ni a; Mizoram aṭangin Taxation minister Lalchamliana leh Taxation secretary Vanlalchhuanga te an tel. 

Meeting-ah hian minister Lalchamliana chuan, Mizoram leh hmarchhak state-te tana Non-Lapsable Central Pool of Resour-ces (NLCPR) scheme a ṭangkai rualin, fund tihhniam a nih tâk avangin Mizoramin harsatna a neih phah thu a sawi a; project kal lai tam tak tana fund pek chhunzawm turin rawtna a thlen.

Lalchamliana chuan, tuna scheme thar North East Special Infrastructures Development Scheme (NESIDS)-in state-te mamawh a phuhrûk zawh loh viau thu sawiin, "Tun hmaa NCLPR-a sum pek ang zah tal NESIDS hnuaiah pek ni se. Phai ram aiin tlang ramah hna thawhna man a sang bik a, tlang ram tan bik rate item leh hnathawh zawh hun chhung bitukah kal dan phung hran neih a ṭul," a ti. Meeting hi Ministry of Finance huaihawt niin, Union Finance secretary Rajiv Kumar-a'n a kaihruai a; state leh UT-te mamawh leh ngaih pawimawhte sawiho a ni.