KHAWTHLIR

Dry day

Excise & Narcotics Commissioner chuan hriattirna chhuahin, Aizawl Municipal Corporation (AMC) inthlan tur avangin April 20, 2026 tlai dar 4 aṭanga April 21, 2026 tlai dar 4 thleng leh, vote chhiar ni April 27, 2026 chu AMC huam chhungah 'dry day' atan a puang. Vote thlak ṭhat ngai a awm a nih chuan, vote thlak ṭhat ni April 23 pawh dry day a nih tur thu a puang bawk. Dry day-ah hian zu lam chi reng reng hralh leh in khap a nih thu a tarlang.

Chawlh puang

General Administration Department chuan vawiin April 14 hi Dr BR Ambedkar pian champha a nih avangin sorkar chawlh (holiday)-ah a puang a; nimin khan hriattirna tihchhuah a ni. Dr BR Ambedkar hi India Constitution duannaa thawh hlawk bera ngaih a ni a, Father of the Indian Constitution tia sawi ṭhin a ni.

Sanitation Day

Nimin khan 8th Poshan Pakhwada 2026 pualin Women & Child Development, Mamit district chuan Siamliana Hall-ah Poshan Panchayat Meet & Sanitation Day an hmang. Mamit khawpui chhunga Poshan Panchayat Committee member-te nen hun hman a ni a, Poshan Panchayat Committee mawhphurhna, ei tur ṭha pawimawhna leh screen time reduction (screen en tlem) chungchangte tarlan a ni.

Election training

AMC inthlanpui neih tura presiding officer leh polling official-te tan nimin khan District Election Officer pisa, District Municipal Election Officer pisa leh IASE conference hall-ah te training buatsaih a ni a; polling station 264-a duty tur presiding officer, polling officer I leh II te an tel. Master trainer - Lalruatpuii Hnamte, Esther Leihang, Christina Lalmuanzuali, F Lanisai, Dr Lalchamliani, Malsawmhriatzuali, Ngurthansanga, Obed Lalmalsawma, Samuel Malsawmzuala, Hmingmawizuala, Lalawmpuia, Lalhriatpuii Phutin, PC Lalrammuanpuia, Lalrindika, Lalṭhakima Chhangte leh VL Chaka Hmar ten thil pawimawhte an hrilhfiah a ni.