Green-Ag Project-a hmalaknate thlirho

Green-Ag Project Mizoram hnuaia Green Landscape Implementation Unit (GLIU), Lunglei Technical Support Group (TSG) chu nimin khan an chairman Navneet Mann, Lunglei bawrhsap hoin DC conference hall-ah an ṭhu a; Green-Ag Project hma lak tawhna leh kum 2026-27 atana ruahmannate an thlirho.

State technical coordinator Dr Kenny Vanlalhriatpuia chuan, Mizoram chu India rama Green-Ag project-a hma la ṭha berte zinga mi a nih thu a sawi a; GLIU ṭobul leh a thil tumte a sawifiah. Green-Ag GLIU team leader in-charge Dr Vanlalchhandama chuan kum hmasaa hmalaknate a tarlang a, kum 2026-27 atana project hmachhawp leh hmalak hmanhmawh ṭul bikte a pharh.

Ṭhutkhawmah hian Agriculture line department aṭangin mithiamte an tel a; Lunglei district-a hmachhawp langsar zual - Sustainable Agriculture hnuaia vaimim, hmarcha, bekang leh thlasik thlai chin dan tur te, vawk leh ar vulhtute tana zirtirna pek dan tur te, thing phun leh kangmei chhuak tur vennaa hmalakna turte leh, protected area chhehvela ramngaw leh nungcha humhalh dan tur chungchangte sawiho a ni.

Green Landscape Management Plan hmalaknate thlirho niin, Lunglei district-a line department hrang hrang nena thawhho dan tur (convergence) chungchang sawiho a ni a; kum 2026-27 Annual Work Plan leh budget atana ruahman cheng nuai 133.37 pawm a ni.

Lunglei DC Navneet Mann chuan, Green-Ag chu loneitute'n ram tichereu tam lo zawnga eizawnna ngelnghet an neih theihna tura hmalakna a nih thu a sawi a, "A hlawhtlin ngei ka beisei a, Mizoram hmun dang tan pawha entawn tlaka hmalak zel a nih ngei ka beisei," a ti.

Green-Ag Project hnuaiah hian Lunglei leh Mamit district-a khaw 38-ah ram hectare 8,972.1 vela zauah hmalak mek a ni a; Lunglei district-ah Bunghmun RD block-a khaw 13-ah kalpui a ni. April 10, 2025 khan Mamit district Annual Work Plan & Budget cheng nuai 152.86 pawm a lo ni tawh bawk.

Green-Ag Project hi Food and Agriculture Organisation leh Global Environment Facility fund hnuaia kalpui a ni a; a tum ber chu India rama lo neitute'n ngêlnghet zawk leh ramngaw tichereu lo zawnga eizawnna tlo leh hma-sawnna an neih theih nanahma lak a ni.