Fire Service Week hman ṭan a ni

India ram pumah kum tin April 14-20 chhungin Fire Service Week hman ṭhin a ni a, nimin zing khan Hunthar Venga Fire & Emergency Services (FES) department hmunpuiah FES director HL Thangzuala'n Mizoram puma Fire Service Week hman turin a hawng.

FES Director chuan, India rama Fire Service Week hmanin a tum ber chu, mipui vantlang leh mimal tinte'n an ni tin nun, khawsak leh chet velnaah kângmei tichhuak lo tura invenna leh fimkhur nachang an hriat theihna tura inzirtir a nih thu a sawi a; thawktute chu mipui rawngbawltu an ni tih inhre thar turin a chah.

Mizoramah chuan kumin Fire Service Week pual hian damdawi-in thlan bikah Fire Safety Audit neih a nih dawn a; sikul hrang hrangah sikul naupangte Fire & Evacuation Drill leh Lecture & Demonstration neih a ni ang.

Fire Service Week pual hian Mizoram aṭangin FES-a thawk mi panga chu Director General - Fire Service, Civil Defence & Home Guard, Ministry of Home Affairs chuan an hnathawh ṭhat avangin Silver & Bronze Disc and Commendation Certificate dawng turin a thlang.

April 14, 1944 khan indo lawng lian SS Fort Stikine, ralthuam leh bomb lam chi tam tak phurtu chu Mumbai lawng chawlhhmuna a thlen hnuah a kâng a, kângmei chhuak ṭhelh tuma beitu Bombay Fire Brigade mi 66 leh Bombay Salvage Corps mi 11-in an thih phah a ni.

Mitthite hriatrengna atan April 14 chu Fire Service Day-ah puan a ni a, April 14-20 chhungin Fire Service Week hman a ni ṭhin. Week chhung hian India rama fire service chi hrang hrangte chuan hmun hrang hrangah kangmei laka himna tur zirtirna an buatsaih ṭhin a ni.

Kumin Fire Service Week thupui chu 'Safe school, safe hospi-tal & fire aware society – Toge-ther for fire prevention' tih a ni.