Infiammite theihna tihhmasawn kan ngai pawimawh ber - Sports Minister

Sports & Youth Services (SYS) minister Lalnghinglova Hmar chuan April 13, Thawhṭanni zan khan Khawhaiah Tuichangral Games & Sports Association (TGSA) buatsaih Khawhaiah a hawng a; infiamna ruhtel leh thil dang an ngaih pawimawh rualin, infiammite theihna tihhmasawn an ngai pawimawh ber thu a sawi.

Tuichangral Games hi April 13-22, 2026 chhunga neih tur niin, a hawnna inkhawm hi Khawhai Town Hall-ah buatsaih a ni a; adviser to chief minister Lalmuanpuia Punte, MLA pawhin a hmanpui.

SYS Minister chuan, Tuichang-ral Games chu GSA leh mipui ṭangrualin an buatsaih a nih avangin a ngaihlu hle tih sawiin, "Sports Minister dinhmun ka luah tirha ka tih hmasak ber pakhat chu Tuichangral Games leh Tuipuiral Games tihmasawn tura hmalak a ni," a ti a; Tuichangral Games chu ngaihlu zual zel tur leh naupang zawkte tan inselna uar zawka buatsaih ṭhin turin a chah.

Sorkarin Olympic 2036 hmathlir neiin a bulṭhut aṭangin infiamna a kalpui tih sawiin Lalnghinglova Hmar chuan, "Infiamna ṭhenkhatah India rama langsar pha khawp kan nih avangin sports-a sâng ta viauah kan inngai mai thei. National Games darthlalangah kan dinhmun dik tak pho lanin a awm ṭhin a, India rama infiamna khawmpui lianah a hnuai lamah zel kan awm ṭhin. Chu chu thlak kan tum a, infrastructure leh thil dang kan ngaih pawimawh rualin, infiammite theihna tihhmasawn kan ngai pawimawh ber," a ti a; a bulṭhut aṭangin coaching ṭha pek an duh thu a sawi.

Sports Minister chuan, Empowering Mizoram Sports (EMS) kaltlangin Mizoram sorkarin infiammite bána kaihna tur kalpui mek a nih thu sawiin, "Infrastructure lam buaipui ṭhulh loin, a pawimawh zawk infiammite chher chhuah chu kan tum lian ber a ni a, EMS hi a taka kalpui mek tawh a ni," a ti. EMS hnuaiah thalkah (archery), badminton, boxing, hockey, judo, taekwondo, weightlifting leh wrestling-ah te naupang kum 8-15 inkar tan ni 15 (darkar 45) chhung coaching kalpui a nih thu a sawi bawk.

Kumina Tuichangral Games-ah hian Mizoram State Sports Council, sports association-te leh Tuichangral GSA ten kum 16 hnuai lam tan boxing, weightlifting leh wrestling-ah inelna an buatsaih dawn a; inelna buatsaih nan sorkar aṭangin sports association-ah Rs 1,00,000 ṭheuh leh Tuichangral GSA-ah Rs 50,000 pek ṭhin a ni.

Tuichangral Games buatsaihna atana GSA hnenah sum pek ṭhin chu nakum aṭangin Rs 1,00,000-ah tihpun a nih tur thu Sports Minister chuan a puang a; Khawhai khelmual tihhmasawn nan cheng nuai 15 dah a nih tawh thu a puang bawk.

Tuichangral Games hi kum 1970 khan ‘Tuipui, Tuichangral Mini Olympic’ tiin ṭan a ni a, chawlhan a nih hnuah kum 2025 khan chhunzawm leh niin, kumina Games hi a vawi 15-na a ni. Kuminah hian football (mipa leh hmeichhia), volleyball (mipa leh hmeichhia) bakah, kum 16 hnuai lam tan boxing, wrestling leh weightlifting-ah te inelna buatsaih a ni ang.