Chhiarpui buaipuitute ṭha taka thawhpui turin Census Operation-in mipui an ngen

Press Information Bureau (PIB) bultumin Chhiarpui 2027 buaipuitu Directorate of Census Operations leh state nodal department - GAD hotute'n nimin khan Aizawl Press Club-ah thuthar thehdarhtute an kâwm a; chhiarpui neih meka thawktute ṭha taka thawhpui turin mipui an ngen.

Directorate of Census Operation director Vinod P Kavle chuan, online hmanga chhiarpuia mahnia inziah luhna (self enumeration) chu nimin (April 15) khan khâr a nih thu leh, vawiin aṭangin Houselisting & Housing (HLO) Census ṭan a nih dawn thu a sawi.

Vinod P Kavle chuan, HLO kalpui turah chhiarpui buaipuitu (enumerator)-te ṭha taka lo thawhpui tur leh zawhnate ṭha taka lo chhang turin Mizoram mipui a ngen a, "Chhiarpuia thil chhinchhiahte hi mi nazawng hnena pek chhuah loh tur (confidential) a ni a, sorkarin a ruatte hnenah chauh pek tur a ni," tiin, chhiarpui buaipuitu enumerator-te chu an indentity card lo en hmasa ṭhin turin mipui a chah.

Census hotute chuan, April 16 - May 15, 2026 chhungin Mizorama in tina kalin, in leh a chhunga awmte chhinchhiahna (Houselisting & Housing Census) neih a nih dawn thu an sawi a, "Zawhna 34 a awm dawn a, kan inte kha eng anga sak nge, electric leh tui dinhmun, ei leh in, electronic bungrua kan neihte leh lirthei kan neih zatte min rawn zawt dawn. Information dik lo petute chu dan hmanga hrem theih an ni," an ti.

Census Operation hotute sawi danin, February 2027-ah chhiarpui thawh hnihna, mihring chhiarna (population enumeration) ṭan a ni dawn a; mihring zat, hming, kum, nihna (sex), sakhua, zirna, ṭawng leh thil chi hrang hrang chhinchhiah a nih dawn.

Population enume-ration chu khua leh tui chhiarna ni loin, ram chhunga cheng zawng zawng chhiarna tur a nih thu sawiin Census hotute chuan, "Khua leh tui ni leh ni lote pawh ram chhunga khawsa pangngai (normal resident) zawng zawng chhiar an ni dawn. A chhan chu kan power, ration, etc an hman ve vek avangin chhiar tel vek tur an ni," an ti. State danga zirna leh hna avanga awmte chu an awmna state-ah normal resident angin chhiar tel an nih dawn thu an sawi bawk.