SCERT leh rualbanlote enkawltu sikulte'n thawhhona thuthlung ziak

Mizoram State Council of Educational Research and Training SCERT chuan nimin khan Aizawla special school panga leh inclusive school pakhat te thawhhona thuthlung, memorandum of understanding a ziahpui.

Thuthlung ziah hi rualbanlote tana thawhhona ṭha lehzual a awm theihna tura ruahman a ni a, MoU ziahna inkhawm hi SCERT pisaah neih niin, SCERT director Caroline Zoramthangi leh special school leh inclusive school aiawhte'n hming an ziak.

SECRT Director chuan, rualbanlote enkawltu sikulte nena thawhhona thuthlung an ziak chu SCERT leh Mizoram tan méllung pawimawh a nih thu a sawi a, "Rualbanlo naupangte hi enkawl dan azirin engkim an ti thei a, special school-te an pawimawh hle. Special school leh inclusive school te tana academic support pe turin engtik lai pawhin SCERT kan inhawng a ni," a ti.

MoU ziahna inkhawm hi SCERT deputy director Lalnunsiami'n a kaihruai a, special education officer Rorelkima'n MoU ziah chungchang a sawifiah a ni.

SCERT NENA MOU ZIAKTE

1. Gilead Special School, Bawngkawn

2. Special Blind School, Durtlang

3. Ephatha Society of Mizoram for the Deaf and Hard of Hearing, College Veng

4. Redeem Garden, Durtlang

5. Shining Star, Republic Veng

6. Durtlang Primary School-II