Kuhva chîn dan leh enkawl dan inzirtir

Krishi Vigyan Kendra (KVK), Kolasib district chuan nimin khan an hmunah Bilkhawthlir Kuhva Chingtu Pawl member-te tan kuhva chin leh enkawl dan inzirtirna, 'Integrated Scientific Approach for Sustainable Arecanut Production in Kolasib District' an buatsaih a, Kolasib bawrhsap H Dolianbuaia'n a hmanpui.

Kolasib Bawrhsap chuan, kuhva chu Mizoram tana eizawnna innghahna ban pawimawh a nih thu sawiin, "State economy chawikang theitu lian tak a ni," a ti a; ṭang taka hna thawk a, theihtawp chhuah zel turin kuhva chingtute a chah. Hlawhtlinna tluantling nei turin mithiamte thurâwn lak ṭhin a ṭul thu a sawi bawk.

KVK Kolasib-a head & scientist Dr Michelle C Lallawmkimi'n kuhva chingtute chu KVK Kolasib-a mithiam, thiamna hrang hrang neite ṭangkai taka hmang a, râwn nachang hre tur leh, KVK-a mithiamte thurawn zâwm ṭhin turin a chah.

Training-ah hian thil pawimawh an inhrilhfiah hnuah farmer-scientist interaction hun hman a ni a; kuhva chingtute'n kuhva an enkawlnaa an harsatnate an zawt a, mithiamte nen sawihona hun hman a ni.