Women's Reservation Bill thlawpna lantir nan Two Wheeler Rally buatsaih

BJP, Mizoram Pradesh chuan nimin khan Vanapa Hall kawt leh Upper Republic-a an pisa inkarah Nari Shakti Vandan Adhiniyam thlâwpna lantir nan Two Wheeler Rally an buatsaih.

Rally hi Vanapa Hall kawtah ṭanin, Mizoram BJP joint treasurer Lalremsangi Fanai-in thu a sawi a, "Prime minister Pu Modi kaihhruai hnuaiah Women's Reservation Bill hman theih tura sawiho a ni dawn ta hi a lawmawm hle. Rally-a lo kalte hi BJP an nih vang ni loin, Women's Reservation Bill ṭha kan tih vang a ni a, nakin lawkah chuan Mizo hmeichhia MLA tam tak kan la nei dawn a ni," a ti.

Two Wheeler Rally-a telte hi Vanapa Hall kawt aṭanga tlan chhuakin, Sikulpuikawnah an kual a, Upper Republic-a BJP pisaah an lut khawm a, inkhawm buatsaih niin, Mizoram BJP president Dr K Beichhua'n thu a sawi.

Dr K Beichhua chuan, Women's Reservation Bill chu Mizoram hma lam hun thui tak hril thei tur a nih thu sawiin, "Mizo hmeichhia ram leh hnam tana hma la duhte chuan tun hma aia nasa zawka inbuatsaih a ngai a, MLA seat tam zawk hmeichhiate tan a nih tawh dawn avangin Mizo Hmeichhiate aiawha ding thei tur khawpa lo inbuatsaih a pawimawh. Hmeichhiate'n kan thâ kan tih chak a, ram rorelnaa ṭangkai taka thawk thei turin kan inbuatsaih a ngai a ni," a ti.

PM Narendra Modi-a'n hmeichhiate chàwi kàn a ngai pawimawh hle nia sawiin BJP President chuan, "Hmeichhiate heti tak maia chawi kân a duhna hian India ram pumah a ṭha zawnga nghawng a neih ngei kan ring," a ti a; Mizoramah hmeichhia, chhungkaw châwmtu an tam tawh thu leh sa sât thlengin hmeichhia ṭhahnem tak an awm tawh thu a sawi.