Lo inrálrin dan tur sawiho a ni

Lawngtlai bawrhsap Donny Lalruatsanga kaihruaiin nimin khan a pisaah Bangladesh rama sentût (measles) lêng mek laka district mipui fihlim theihna atana inven dan leh lo inrálrin dan tur sorkar hotute'n an rêl.

Donny Lalruatsanga chuan, sentût vangin Bangladesh-ah tun hnaiah mi 100 aia tam an thi tawh tih sawiin, "Lo inrálrin leh tih tur ṭul ang angte lo tih lâwk a ngai. Kan district hi Bangladesh nena ramri nei kan nih angin hri lo leng lut thei reng a ni a, medical team bakah Lawngtlai mipui lo inrálrin a ṭul," a ti.

A bik takin naupang kum 5 hnuai lamin an vei nasa ṭhin tih sawiin Bawrhsap chuan, "MR vaccine lâk a pawimawh tak zet," a ti a; nu leh pate chu an fate a hma lama vaccine laktir ṭheuh turin a chah a, chak zawka invenna kalpui turin a hma lama advisory chhuah turin department hotute a hrilh.

Lawngtlaia chief medical officer Dr Lalmuanawma Jongte chuan, sentût lêng mek laka inrâlrin dan tur a tarlang a, "Vaccine lak ṭhat hi invenna ṭha ber a ni a, 95% aia tam MR vaccine la ngei tura hmalak a ṭul. Vaccine hi nausen thla 9-12 inkar leh naute thla 16-24 inkar hnenah pek ṭhin a ni a, dose hnih pek ṭhin a ni," a ti.

Sentút chu measles virus-in a thlen ṭhin tih sawiin Lawngtlai CMO chuan, "Boruakah a lêng thei a, fimkhur a ṭul hle. Sentût laka inven nan chak zawka surveillance kalpui a ni. PHC leh CHC-ah rapid response team tihnun vek a ni tawh," a ti a; mobile vaccination team pawh an inrálrin tawh thu a sawi.