Lok Bhavan-ah Chhiarpui 2027-a Houselisting and Housing ṭan a ni

India ram Chhiarpui 2027-a Mizorama House-listing and Housing kalpui tur chu nimin khan Lok Bhavan-ah ṭan a ni a, Governor Gen. Vijay Kumar Singh ziah luh hmasak ber a ni.

Lok Bhavan atana enumerator tura ruat H Lalremruati chuan Larsapin April 7, 2026-a self enumeration a lo tih tawh aṭanga self enumeration ID (SE ID) a dawn hmangin tih tur ṭulte a tihsak. Bul ṭannaah hian Directorate of Census Operations aṭangin principal census officer Joseph H Lalramsanga leh official dangte an tel.

Lok Bhavan-a Houselisting and Housing tih zawh hnu, chawhnu dar 1-ah Chief Minister banglaah tih leh a ni a, chief minister Lalduhoma'n April 1, 2026-a self enumeration a tih tawh behchhanin Houselisting and Housing tihsak a ni. Chumi hnuah ram chhung hmun dangte rualin Mizoramah Houselisting and Housing tih zui a ni.

Larsap chuan, chhiarpui buaipuitute chu hmaih awm loh nan theihtawp chhuah tura chahin, "A vawi khatna atana digital census kalpui a ni a phûrawm," a ti a; mipui zinga hriat thiam loh neite ṭha taka hrilhfiah zel tur leh mi tin chhiarpuia ziah luh vek an nih theih nan ṭan la turin chhiarpui buaipuitute a chah a; chhiarpui buaipuitute ṭha taka ṭawiawm turin mipui a chah bawk.

Sorkar chuan tluang leh felfai taka chhiarpui kalpui a nih theih nan mipuite chu anmahni pan chilhtu census enumerator-te ṭha taka lo ṭawiawm tur leh, an hriat duhte ṭha leh dik taka lo chhang turin an ngen a ni.