Kum khatah state pawn aṭangin sangha qtl 11,808 vel la lut ṭhin

Nimin khan Fisheries secretary Lalrothanga hoin a pisaah sangha thianghlim zawk lak luh leh zawrh chungchang sawiho a ni a, Fisheries department leh Food & Drugs Administration (FDA) hotute an tel. Lalrothanga chuan, kum khatah state pawn aṭangin sangha qtl 11,808 vel lak luh ṭhin a nih thu a sawi.

Fisheries Secretary chuan, Mizoramin sangha khamkhawp a la thar theih loh thu a sawi a, "Eng emaw zat phai aṭangin lak luh a la ngai. Fisheries department chhinchhiah danin, kum khatah sangha qtl 11,808 vel la lut angin tarlan a ni. Mizoramin sangha a thar tamna Kolasib leh Mamit district-a mite chu state dangah a tam zawk hralh ṭhin a ni," a ti.

Mizoram sangha mamawh tam zawk chu state pawn aṭangin lak luh ṭhin a nih thu sawiin Lalrothanga chuan, "Mizorama sangha tharte Mizoram chhunga hralh thei tura a zuartute hmalakpui a ngai," a ti a; state pawna aṭanga sangha lak luhte leh Mizorama tharte chu a thianghlim tâwk em tih enfiah a ṭul thu a sawi.

FDA aiawh Lalrinkimi Pachuau chuan FDA hmalaknate sawiin, FDA-in state dang aṭanga sangha rawn lut an endik tawh dan a tarlang a; thawktu leh sum indaih lohna avangin an endik reng theih loh thu a sawi.

Lalrinkimi Pachuau chuan, National Food Safety & Standards Act hnuaiah ei tur zuartute bakah, a hlawma la luttute'n lak luh phalna leh zawrh phalna nei turin FDA aṭangin certificate an neih a ngaih thu a sawi a, "Dan an zawm loh chuan hrem theih an ni," a ti a; sangha thianghlim leh hrisel zawrh leh hralh a nih theih nan kaihhruaina siam ngei ṭha a tih thu a sawi bawk.

Ṭhutkhawmah hian Mizorama sangha tharte state páwna thawn chhuak lo a, Mizoram mipui lei theiha siam ṭul an trih thu an sawi a; state dang aṭanga lak luh turte chu thianghlim thei ang ber lak luh a nih theih nana hmalak dan turte an rêl.

FDA chu inkaihhruaina duang tura ruat a ni a, a ṭul angin Fisheries department mite phungbawmah an sawm ang. Thawktu leh sum mamawh angte sorkarah dil ni se, an ti.