Zo Carbon Product thubuaiah Zodintluanga'n thiam a chang

Minister hlui Zodintluanga Ralte chuan Zo Carbon Product Ltd aṭanga hlâwkna hmu anga puh a nihnaah thiam a chang.

Zodintluanga Ralte hian Hruaitu Arsi chan-chinbu September 1, 2017 chhuakah, Mizo Carbon Product aṭangin hlâwkna hmu anga a chungchang an ziah chu lungawi loin, khatihlaia he chanchinbu publisher MC Lalrinthanga, Khatla South leh editor Lalthanzama Hnamte, Khatla South te lakah September 18, 2017 khan FIR a thehlut a ni.

Thubuai hi Aizawl District Court chuan April 24, 2018 khan a ngaihtuah ṭan a, nimin khan thutlukna siam a ni. Court chuan Zodintluanga Ralte chu thiam a chantir a, Hruaitu Arsi chanchinbua thu ziaktute chu jail tàntir loin, pawisa chawi turin a hrem.

Industrial Growth Centre, Luangmuala Mizo Carbon Product Ltd chuan Central Transport Subsidy (CTS) leh Central Capital Investment Subsidy (CCIS) te dik lo takin a dil nia sawi a awm a; CTS leh CCIS aṭang hian khatih laia minister Zodintluanga Ralte hian hlâwkna a hmu ve anga puh a ni.