Thing kit chhunzawm rih lo

Centre for Environ­mental & Social Justice (CESJ) mi leh sate chuan Assam Rifles-in Aizawla an awmna an chhuahsan tak Lammual chhehvela kawngpui zauh nana sorkarin thing a kih tawh loh nan April 15, Nilaini aṭang khan thing kittute an dang a, zanah riah chilhin an veng. Thing 10 vel kih a ni a, nimin lamah chuan thing kih belh a ni tawh rih lo.

CESJ working chairman Vanram­chhuangi chuan, thing kit zâwnga kawngpui zauh tum chu ṭha lo an tih thu a sawi a, "Kawngpui zau hi kan duh lo a ni bik lo a, mahse, helai hmun ringawta thing kita kawng laih zauh hian Aizawl khawpui traffic tâwt a tihziawm phah dawn lo. Thih huamin hma kan la a, a ṭul dan a zirin Court thlengin kan kal ang," a ti a; thing chu kit loa phunsawn emaw, lâi hêl emaw zawk mai tura sorkar an ngen thu a sawi.