Rs 7,01,40,000 hù heroin leh meth man

Mizoram Police chuan April 10-16, 2026 chhungin Champhai district leh Khawzawl district-ah heroin leh methamphetamine tam tham tak an man a, Rs 7,01,40,000 hùa chhût a ni.

Khawzawl Police special team chuan nimin zing dar 6 khan Neihdawn pengṭhuama scooter Aerox MZ-01 X-8339 an enfiahnaah a khalhtu Lalhriatpuia (25), Lunglei Chanmari hnen aṭangin heroin gram 104 (hawng 9) an man a; Khawzawl Police Station-ah NDPS Act tlawhchhanin thubuai an ziak lut.

Champhai police-te chuan April 13, 2026 khan mi pathum - Malsawmkima (19), Champhai Zotlang, Lalmuanpuia (27), Falam, Myanmar (Zemabawka khawsa mek) leh Malsawmtluanga (18), Khawmawi, Myanmar nia inchhálte hnen aṭangin methamphetamine kg. 8, an man a; Champhai PS-ah NDPS Act leh Immigration and Foreigner Act tlawhchhanin thubuai an ziak lut. Meth hi Rs 6,40,00,000 hû a nih thu an tarlang.

April 13 vêk khan Champhai police-te'n Mualkawi daiah Super Carry MZ-01 AB-7838 an enfiahnaah David Lalramliana (26), Tahan, Myanmar hnen aṭangin heroin gram 71 (hawng 6) an man a; NDPS Act leh IFA 2025 tlawhchhanin thubuai an ziak lut.

Champhai police-te'n April 12, 2026 khan Khankawn check gate-ah Zokhawthar aṭanga Aizawl lam pan Jawa bike MZ-01 Y-1459 aṭangin heroin gram 60 (hawng 5) an man a, bike khalhtu Lallawmzova (23), Zokhawthar pawh an man nghal.

Khankawn check gate-ah vêk hian April 11, 2026 khan police-te'n maxicab MZ-01 M-9674, Champhai aṭanga Aizawl pan an enfiahnaah heroin gram 72 (hawng 6) an man a, ruihhlo kengtu (passenger)

K Lalrammawii (44), Lunglei Farm Veng (Khawmawia cheng mek) nia insawi an man bawk.

Zokhawthar police pawhin April 10, 2026 khan Zokhawthara maxicab pakhatah driver-in a hrilh angin sarâng ip (polythene)-a dah heroin gram 54 (hawng 5) an man. Maxicab hi police-te'n Aizawlah an zui a, heroin dahna sarâng ip lo dawngsawngtu Zoparmawii (38), Kelkal Tawnzang state, Myanmar an man a ni.

Mizoram Police-in April 10-16 chhunga heroin an man zawng zawng chu gram 361 (hawng 31) niin, Rs 6,140,000 hùin an chhût a; meth man nen belhkhawmin ruihhlo an man hlut zawng chu Rs 7,01,40,000 niin an chhût a ni.