Mi 92 tan puan tahna khawl sem

South Tuipui bialtu MLA Jeje Lalpekhlua chuan nimin khan Hnahthiala Commerce & Industries conference hall-ah National Handloom Development hnuaia Hnahthial District Cluster Development Programme pahnih - South Tuipui leh Darzo cluster chhunga mi 92 hnenah puan tahna khawl a sem.

Puah tahna khawl semna inkhawm hi Hnahthial DCIO HB Lalremmawia'n a kaihruai a; South Tuipui, South Vanlaiphai, South Chawngtui, Cherhlun leh Thingsai leh Darzo khuaa puah tahtu mi 92 hnenah khawl pek a ni dawn a, khawl sem tur chu MLA Jeje Lalpekhlua'n a vailiam a ni.

Jeje Lalpekhlua chuan, puahtah chu MLA a nihna anga hma a lakna hmasa ber pawl a nih thu sawiin, "Puan tahna khawl sem a nih chhan chu, puantaha tuimite'n an thiamnate an pho chhuah a, an thiamna hmanga ei an zawn theih a ni. Hnahthialah hian puantaha tui leh thiam tak tak an awm a, kan tum phawt chuan Mizoram mai ni lo, hnam dang hnena hralh chhuah tlak khawpa ṭha kan siam thei a ni," a ti.

Hnahthialah hmalakna hrang hrang a awm chhoh zel tih sawiin South Tuipui MLA chuan, "Building hrang hrang sak chhoh zel a ni dawn a, tui lakna ṭha leh changtlung zawk Hnahthialin a neih theih nan cheng nuai 600 SASCI aṭangin dah a ni," a ti a; District Hospital-ah blood bank refrigerator dah thuai a nih dawn thu a sawi.