END-in kuminah heroin kg 7.238 leh meth kg 49.392 an man tawh

Excise & Narcotics department (END) chuan kumin 2026 chhungin nimin thleng khan heroin kg 7.238, methamphetamine kg 49.392, ganja kg 90.836 leh ruih theih thil dang eng emaw zat an man tawh tih an tarlang.

END hian April 15, Nilaini chhun dar 11:40 khan Falkland Vengah methamphetamine kg 10.021 (mûm 1,00,000) an man a, hemi kaihhnawihah hian mi pali manin, The Narcotic Drugs & Psychotropic Substances Act, 1985 Section 21(c) tlawhchhanin thubuai an ziak lut.

END hian meth mûm 1,00,000 an man phurtu Jakaria Hussain (28), Dholcherra, Karimganj leh Taj Uddin (25), Nagharia, Karimganj nia inchhálte an man a; an lirthei hman WagonR AS01-FG 7776 pawh an hreng nghal.

Meth man chungchang an chhui zuinaah Myanmar aṭanga rawn kengtu nia sawi Lalnunziri (38), Khawmawi, Myanmar nia inchhal chu April 15 tlai dar 4:30 khan Khatlaah an man a; meth phurh kualnaa lo puitu Vanlalrintluanga (27), Armed Veng South nia inchhal pawh zan dar 7-ah an man bawk. Meth chungchanga indâwr kualna atana an hman mobile phone panga pawh an hrènsak a ni.

END chuan, April 21, 2026-a AMC inthlan tur avangin tunlai hian special drive an kalpui mek a, ngawrh takin ruihhlo donaah hma an la tih an tarlang bawk.