KHAWTHLIR

Zu leh beer man

Phaisen checkgate-a duty police-te chuan April 15, Nilaini khan Bolero MZ-01 AC-4086 aṭangin sapzu leh beer chi hrang hrang tam tham tak an man. Lirthei aṭang hian sapzu litre 279 leh beer litre 228 man a ni a, lirthei khalhtu Subaranta Chakma (49) s/o Judha Moni Chakma, Chawngte pawh man nghal a ni.

END pisa endik

Excise & Narcotics department inspecting team chuan commissioner Z Lalhmangaiha hoin nimin khan Saituala Excise & Narcotics Station an an endik. Z Lalhmangaiha chuan, END chu sorkarin theihtawp a chhuahpui thu sawiin, "Lirthei leh hmanruaah hma kan sawn hle. Sorkar tan leh ram leh hnam tana theihtawp chhuah hi thawktute bat a ni," a ti. Saituala END pisaah hian thawktu 13 an awm mek a ni.

Dawng tur thlang

Serchhip bawrhsap Paul L Khuma kaihhruaiin nimin khan DC meeting hall-ah sorkar hotute leh khawtlang hruaitute an ṭhukhawm a; chhungkuaa eizawngtu berin a thihsante chhawmdawlna atana duan National Family Benefit Scheme hnuaia ṭanpuina dawng tur an thlang. Ṭanpuina hi chhungkaw pakhatah Rs 20,000 zel a ni a, dilna 23 zinga 10 chu ṭanpuina dawng turin an thlang a ni.

Naupang venhim dan tur inzirtir

Hnahthial District Child Welfare and Protection Committee chuan nimin khan kohhran hruaitute pualin naupang venhimnaa hriat tur pawimawh inzirtirna, 'Sensitization Programme on Child Protection and its Related Issues For Church Leaders' an buatsaih a, district bawrhsap K Vanlalruati'n a hawng. Mithiamte'n thil pawimawh hrang hrang an hrilhfiah a ni.

Mau zir chian rel

Lawngtlai bawrhsap Donny Lalruatsanga hoin nimin khan a pisaah National Bamboo Mission, Lawngtlai district an ṭhu a; mau chi (species) ṭha leh a ram leilungin a ngeih tur, mau aṭanga thil siam dan zir mi tam zawk awm thei tura hmalak te, mau chìn, enkawl leh tharah mi tam zawkin eizawnna an neih theihna tura hmalak an rêl.