Salvation camping buatsaih rêl

Lawngtlai bawrhsap Donny Lalruatsanga leh Central Young Lai Association hnuaia ruihhlo dotu Drug Reduction Squad (DRS) hruaitute chu nimin khan DC pisaah an inkâwm a, salvation camping buatsaih an rêl.

Inkawmnaah hian ruihhlo donaah chak zawka hmalak an rêl a; thlarau damna leh piantharna a pawimawh an tih avangin salvation camping huaihawt ngei ni se, an ti. Ruihhlo donaah sorkarin Operation Jericho a kalpui mek chu chhunzawm zel ṭha an ti a, duty leh ṭul dangah hmalakho zel an remti a ni.

Lawngtlai Bawrhsap chuan, ruihhlo tirêm tura hmalaknaah sorkar leh DRS hmalakna chu mipuiin an thlawp a pawimawh thu a sawi a, "Thâ thlah theih a ni lo a, châwl loa hmalak zel a ṭul a, taksa mai piah lamah thlarau damna hi thil pawimawh a ni," a ti a; Lawngtlai district chu ruihhlo awm lohnaa siam turin theihtawp chhuah mek a nih thu a sawi.

DRS hruaitute pawhin ruihhlo donaah sorkar nena thawhho chu ṭul leh pawimawh a nih thu sawiin, mipui tana thawkho turin an inpeih reng tih an sawi a ni.