MLA-in 'Tho Law Dir Tuah' a hawng

Adviser to chief minister Dr Lorrain Lalpekliana Chinzah, Lawngtlai East bialtu MLA chuan nimin khan Lawngtlai DC conference hall-ah 'Tho Law Dir Tuah' (Standup Lawngtlai) a hawng a; hmasawnna ṭha zawk awm turin sorkar bakah, VC, NGO, kohhran leh mipui ṭanrual a pawimawh thu a sawi.

Dr Lorrain Lalpekliana chuan, Tho Law Dir Tuah chu Lawngtlai khawpuia hmasawnna leh inrelbawlna ṭha zawk awm tur a nih thu sawiin, "Lawngtlaiah state sorkar leh LADC te pheikhai rual taka an kal dun a pawimawh a, Tho Law Dir Tuah hian thawhhona ṭha zawk a thlen ngei ka beisei. Hmasawnna ṭha zawk awm turin sorkar bakah VC, NGO, kohhran leh mipui ṭanrualna a pawimawh dawn hle a ni," a ti a; sorkar ṭawiawm thin turin pawl leh mipui a sawm.

Lawngtlai chu khawpui nuam leh district changkang zawka siam turin MLA a nihna angin a thawh zel dawn thu sawiin Dr Lorrain chuan, "Hlawhtlinna leh hmasawnna tluantling awm turin mimal emaw, pawl emaw hming khat anga hmalak mai theih a ni lo a, mi tinin mahni zawn ṭheuhah ṭhahnem ngai taka kan thawh a ṭul a ni," a ti.

LADC chief executive member C Lalsawmzuala pawhin thu sawiin, Tho Law Dir Tuah hlawhtlinna turin LADC-in theihtawp a chhuah dawn thu leh, Lawngtlai khawpui nuam leh felfai zawk siam turin thawhhona ṭha a awm a ṭul thu a sawi.