KHAWTHLIR

PYD-in thisen pe

PYD (NEI) Chhipphir Section chuan nimin khan Civil Hospital, Lunglei tan thisen unit 35 an pe a, petute mipa 29 leh hmeichhia paruk an ni.

Ar notê sem

Khawzawl Wildlife Division hmalaknain April 16, Ningani khan Murlen National Park hnuaia Eco-Development Activity, CSS - IDWH scheme kaltlangin Rabung, Tualpui leh Khualen khuaah te chhungkaw 60 hnenah ar (rainbow rooster) notê 3,000 sem a ni. Scheme hmang hian Murlen National Park leh Lengteng Wildlife Sanctuary hual veltu khaw 13-ah ar notê 15,000 sem tum a ni.

Sentezêl Quarry

Sialsuk leh Thenzawl inkar Sentezel quarry chu nimin chawhma dar 11:30 vel khan nasa takin a chim a, Aizawl-Thenzawl-Lunglei kawngpui a hnawh ping. Kawngpui hi nimin tlai dar 3 vel khan lirthei kaltlang theiha then niin, lirthei tángte kaltlangtir a ni a; mahse, lei/lung tla then tur a tam avangin khâr ṭhin a ni dawn nia thu dawn a ni.

Tomato chîn zirtir

KVK, Khawzawl chuan nimin khan an training hall-ah Khawzawla tomato chíng turte hnenah tomato chin dan leh enkawl dan an zirtir a, Khawzawl KVK head Dr Malsawmkimi'n kaihruaiin, thil pawimawhte a zirtir. Tomato chi leh thlai chi dangte bakah, thlai enkawlna tur hmanrua an sem nghal bawk.

END pisa tlawh

Excise & Narcotics commissioner Z Lalhmangaiha chuan April 16, Ningani khan Khawzawla END Assistant Commissioner pisa a tlawh a, office dinhmun a enfiah bakah, thawktute nen an inkâwm. Khawzawl END pisaah hian Assistant Commissioner hoin enforcement staff pasarih leh fourth grade pakhat an awm mek a; constable pahnih dah belh thuai tura hmalak mek a ni.

ST tana ṭanpuina

Ministry of Tribal Affairs chuan scheduled tribe-te hamṭhatna atana hma latu NGO leh voluntary organisation te hnena 'Aid to Voluntary Organizations Working for the Welfare of Scheduled Tribes' scheme hnuaia ṭanpuina (grant-in-aid) a pek ṭhin chungchangah hriattirna a tichhuak. Scheme-a project kal mek (March 2026 thlenga grant la)-te'n dilna NGO Grants Portal-ah April 30, 2026 ral hmain an thehlut ngei tur a ni a, portal khar hmaa dilna thehlut hman lote chu ngaihtuahsak an ni tawh dawn lo tih taran a ni.

Sanitation Task Force ṭhukhawm

Kolasib Town Sanitation Task Force chu an chairman H Dolianbuaia, bawrhsap kaihhruaiin April 16, Ningani khan an ṭhukhawm. A hmun loa bawlhhlawh paih te, mumal taka bawlhhlawh ṭawih thei leh ṭawih thei lo thliar hrang lote chu Kolasib Town Solid Waste Management Bye-Laws hnuaiah Rs 5,000 thleng chawitir theih a nih thu tarlan a ni.

ZPM rorel ṭha ti

Mizoram Poor Federation chuan thuchhuah siamin, ZPM-in mirethei thleng phaka rorelna an nia sawiin, ṭha an tih thu an tarlang a; an member-te chu an ward ṭheuhah ZPM candidate-te vote turin an chah. "ZPM candidate-te kan awmna ward ṭheuhah lungrual taka vote tura kan ngenna a hlawhtling hle a, AMC-ah ZPM-in sorkarna an siam ngei dawn niin kan hria a, kan lawm hle," an ti.