Apex Bank-in cheng vbc 40 hlêp

Mizoram Cooperative Apex Bank Ltd. Board of Directors chu nimin khan an Head Office-ah an ṭhu. Loan chi hrang hrang - biak-in loan, handholding loan, society loan, mimal loan chi hrang hrang, a vaiin cheng nuai 2,254 pek an remti a; kum 2025-26 chhungin cheng vbc 40 an hlêp.

Ṭhutkhawm hi MCAB chairman Lalnunsanga'n a kaihruai a, financial year 2025-26 chhunga an dinhmun thlirho a ni. Sum kum liam ta chhung khan MCAB hian deposit cheng vbc 1,930 an dawng a, loan cheng vbc 1,272 an pe chhuak a; cheng vbc 40 an hlep. Sum an hmuh leh loan an pek chhuah khaikhinna, credit deposit ratio chu 69% a ni.

Apex Bank hian branch 35 leh ATM booth 45 an nei mek a; anmahni dawrtu Mizo mipui chungah an lawm thu an tarlang.