KHAWTHLIR

Book of the Year ‘Kham leh suar’

Mizo Academy of Letters (Thu leh Hla Inpui) chuan kum 2025 chhunga Mizo ṭawnga chhuak lehkhabu ṭha Book of the Year 2025 atan ‘Kham leh suar’ tih, Lalrammawia Ngente ziah an thlang. Book of the Year lawmman April 23, 2026-a MAL din champha lawmnaah hlan a ni ang.

Wold Heritage Day

Assam Rifles chuan April 18, 2026 khan Champhai Zote YMA Hall-ah tualchhung mite nen Wold Heritage Day an hmang. He hunah hian YMA hruaitute leh khawtual mi ṭhenkhat an tel a; hnam nunphung, zia leh chin dan te, ram leh hnam hmun hluite humhalh a pawimawh dante an inzirtir nghal a ni.

Ambulance vailiam

Mamit district-a Silsury khaw tana hman tur ambulance, NBCC (India) Ltd.-in an pe chu April 17, 2026 khan Larsap Gen. Dr Vijay Kumar Singh-a'n Lok Bhavan aṭangin a vailiam. Larsap chuan, rualkhai taka hmasawnna kalpui turin ram dang leh state thenawmte nena inrinaah hmasawnna ruhrel siam a pawimawh thu sawiin, ramri depa khua Silsury-in an ṭangkai pui tur ambulance ṭha tak NBCC-in an pe chu lawmawm a tih thu a sawi.

CADS ruihhlo man

Central YMA hnuaia ruihhlo dotu Central Anti Drugs Squad (CADS) chuan April 11-17, 2026 chhung khan heroin hawng 22 leh Tictac bûr 38, codeine bûr 770 leh ganja kg 7.596 an man a, a kaihhnawihah mi 41 an man. Mi an man zinga pathum chu Excise & Narcotic department-ah an hlan a, mi 38 chu counselling class kaltir an ni.

Drone survey

Agriculture & Farmers' Welfare department chuan Digital Agriculture Mission hnuaia Digital Public Infrastructure kaltlangin tunlai hian Lunglei district-ah drone hmanga huan/lo/ram leh thlai chin chanchin zirchianna (drone survey) an kalpui mek. Drone survey hi Kolasib, Serchhip leh Mamit district-ah tih a ni tawh a, sq. km 700-a zau (cultivated land survey) zawh tawh a ni.