MCC bawhchhiaa puhte thiam chantir an ni

State Election Commission (SEC) chuan MNF party leh Congress party-in Model Code of Conduct (MCC) bawhchhiaa ZPM party mi paruk an puhte chu thiam a chantir.

SEC hotute chuan MCC bawhchhiaa inpuhna chi hnih chu April 18, Inrinni khan an ngaihtuah a; MCC bawhchhiaa puhte'n an bawhchhe ngei tih fiahna, a puhtute'n an neih loh avangin SEC chuan thu tlingah ngai loin an hnawl a, MCC bawhchhiaa puhte thiam a chantir a ni.

MNF Legal Board chuan Lok Sabha MP Richard Vanlalhma-ngaiha, minister C Lalsawi-vunga, minister of state B Lalchhanzova leh ZPM candidate K Lalrodinga te chu MCC bawhchhiaah puhin April 15, 2026 khan Aizawl District Municipal Election Officer hnenah complain an thehlut.

Congress party pawhin minister PC Vanlalruata leh adviser to CM Lalmuanpuia Punte, MLA te chu MCC bawhchhiaah ngaiin, April 16, 2026 khan SEC-ah complain an thehlut bawk.

MCC bawhchhiaa puh mi parukte hi April 17, 2026 tlai dar 4 ral hmaa ziaka insawifiahna thehlut turin SEC chuan a hriattir a; mi parukte chuan insawifiahna an theh luh vek bakah, complaint thehluttu MPCC Legal Cell secretary H Lalmuankima leh MNF Legal Board joint secretary Lalbiakkima te chu finfiahna (evidence) an neih ang ang thehlut tura hriattir an nih angin an thehlut bawk.

SEC tarlan dan chuan, insawifiahna leh finfiahna thehluhte hi zir chian a ni a; MCC bawhchhiaa puh mi parukte hian an bawhchhiat lohna tifiahtu (evidence) an tarlan theih laiin, MCC bawhchhiaa puhtute'n finfiahna an pe thei lo thung. Hei vang hian SEC chuan MCC bawhchhiaa inpuhnate chu thu tlingah ngai loin a hnâwl ta a ni.