Kolasib Bawrhsapin kawng siam a enfiah

Kolasib bawrhsap H Dolianbuaia chuan April 18, Inrinni khan Kolasib district-a National Highway no. 306 leh 06 hman mek leh thlûr li (four lane) ni tura siam mek te a enfiah a; hna thawktute chu theihtawp chhuaha thawk zel turin a chah.

Bawrhsap hi NHIDCL hotu te, Kolasib additional DC B Malsawmtluangi, Kawnpui SDO, Kolasib IPRO leh SDC ten an ṭawiawm. DC chuan, kawng siamah hmasawnna hmuh tur a awm tih sawiin, hna thawktute chu theihtawp chhuaha thawk chhunzawm zel turin a chah a; kawng an siamnaah harsatna an neihte sutkian a nih theih nan District Administration-in hma a lakpui zel tur thu a sawi.

NHIDCL hotute tarlan danin, NH kawngpui hman lai mek Vairengte-Sairang kawng thawm ṭhat hi hlawm ngaah ṭhen a ni a; hlawm thum zawh tawh niin, hlawm hnihah blacktoping hmabak a la awm. Kawng siam zawh tawh chinte chu four lane laitu EPC contractor-te hnenah hlan a ni tawh.

Kolasib district-a kawngpui thlúr li ni tura laih mek pawh Kolasib DC hian hmun hrang hrangah tlawh nghal. Four lane kawngpui siam tur chu km 90-a thui a ni a, chu'ng zinga km 30 chu kawng awm saah siam a ni dawn a, km 60 chu kawng laih thar (bypass) a ni dawn. Bypass hi hmun rukah a awm dawn a, tuna kawngpui hman lai mek (km 117) aiin km 30-in a tawi zawk dawn a ni.

Kawngpui thar laih mekah hian lei (bridge) eng emaw zat dawh a ni dawn a, lei dawh tur zingah a sei ber tur Mualkhang ramah niin, metre 540-a thui tura ruahman a ni.