Myanmar lam nena sumdawnnaah khuahkhirhna a pawimawh - LADC CEM

Lai Autonomous District Council (LADC) chief executive member (CEM) C Lalsawmzuala chuan, Myanmar nena sumdawnna kal mek chu khuahkhirhna ṭha leh mumal zawka tih a pawimawh thu sawiin, ruahmanna felfai zawk siam nih dawn thu a sawi.

LADC CEM leh Lawngtlai district bawrhsap Donny Lalruatsanga te chuan April 17, 2026 khan Lawngtlai district-a Hruitezawl an tlawh. CEM C Lalsawmzuala chuan, Chhimtuipui lui dunga lawng chet vel dan te, bungraw lut leh chhuakte chu LADC sorkarin awmze nei zawka kalpui a tum thu a sawi a, "Ṭhenawm ram Myanmar nena sumdawnna kal mekah khuahkhirhna ṭha leh mumal zawk kalpui a pawimawh a, felfai zawka ruahmanna siama kalpui a ni ang. Hruitezawl hi ramria awm a nih angin kawng hrang hrangah fimkhur thiam a ṭul dawn a ni," a ti.

Bawrhsap Donny Lalruatsanga chuan, Hruitezawl chu Myanmar nen insumdawn tawnna hmun a nih angin, dan loa ram dang mi luhna remchang a zau hle tih a sawi a, "Heng lakah hian khawtlang hruaitute in fimkhur a ṭul. Hruitezawlah hian raltlan chenna in 300 vel sorkarin a hriatpui a, thlithlai reng an ni a, an khawsak leh chet velnaah dan kalh a awm leh awm loh chîk a pawimawh," a ti a; khawtlangin mamawh a neih hrang hrangah pui turin sorkar a inhawn thu a sawi.

CEM leh DC hian Hruitezawl chhaka khualzinte tlawh ṭhin Bawinu (Beino) an tlawh nghal a; tidanglam loa a tlawhtuten awlsam zawka an tlawh theih dan tur te, a hmunhma chei dan tur leh hahchawlhna remchang zawk siam a nih dawn thute an sawiho a ni.