Lunglei district-ah tleirawl 533 HPV vaccine pe tawh

Lunglei District Task Force on Immunisation chu an chairman Navneet Mann, district bawrhsap hoin April 17, 2026 khan DC conference hall-ah an ṭhukhawm a; Lunglei district-ah chhùl hmáwr cancer thlentu Human Papillomavirus laka invenna damdawi (vaccine) pek rûnpui kalpui mekah tleirawl kum 14-15.3 inkar mi 533 hnenah vaccine pek a nih tawh thu tarlan a ni.

Ṭhutkhawmah hian Lunglei district-a kum 2025-26 chhunga naupang leh nau paite hnena hri leng inkai chhawn theih laka invenna pek dan leh hmalak chhunzawm dan turte sawiho a ni a; Bangladesh-a sentut lêng mekin Mizoram a lo thlen lohna tura hmalak dan turte an sawiho bawk.

Tarlan danin, February 28 aṭanga May 31, 2026 chhunga chhûl hmáwr cancer thlentu Human Papillomavirus laka invenna tur vaccine pek rûnpui kalpui turah Lunglei district-a vaccine pek tur hmeichhe tleirawl (kum 14 aṭanga kum 15 leh thla 3 inkar) mi 1,236 tinzâwn a ni a; tun thlengin mi 533 (43.12%) hnenah pek a ni tawh.

Navneet Mann chuan, Lunglei district chu international boundary nei a nih avangin hri lêng lakah fimkhur a ṭul thu a sawi a, "Ram ṭhenawma sentût (measles) lêngin Lunglei district a thlen loh nan thawktute'n theihtawp kan chhuah zel a ngai. Hriselna kaihhnawiha hmalakna hrang hrangah district thuneitu te, District Rural Development office leh BDO te, ICDS hotute leh anganwadi worker te, local/village council leh tlawmngai pawl hrang hrangte kan thawhho ṭhat a pawimawh," a ti.