LPG-ah harsatna a awm lo - IOC; Thu lêngvâk awih lo turin mipui an ngen

Indian Oil Corporation Ltd. (IOC) hotute chuan Press Information Bureau (PIB) kaihhruaiin nimin khan IPR Auditorium-ah thuthar thehdarhtute an kâwm a; Mizoram chuan eirawngbawlna gas-ah harsatna a awm loh thu sawiin, thu lêngvâk mai mai awih lo tur leh sorkar thuchhuah ring ṭhin turin mipui an ngen.

IOC Aizawl manager (LPG-Sales) Diganta Choudhury chuan, West Asia-a buainain khawvelah eirawngbawlna gas leh a kaihhnawih thil hrang hrangah harsatna thlen mah se, India ramah gas supply a la pangngai reng thu a sawi a, "IOC chuan harsatna a awm loh nan uluk takin a vil reng a, inchhungkhur eirawngbawlna gas (domestic LPG) hi ngaih pawimawh ber a ni. Mizorama chhungkaw nuai 2.97 hnenah LPG kan pe reng a, ni tin gas bûr 8,000 vel sem a ni a, West Asia-a harsatna a thlen hma nena khaikhinin a pangngai reng," a ti.

Gas duh (refill booking)-te chu digital method - SMS/IVRS leh a dangte hmang tura chahin Diganta Choudhury chuan, "Mizoramah digital-a book-tu mi 25,000 vel a awm mek. Gas-te hi a neitu dik tak kuta a thlen ngei nan delivery authentication code (DAC) OTP hmanga sem ṭhin a ni," a ti a; gas hralh rûk (black marketing) leh chhêk khâwl (hoarding) a awm loh nan hma an lak mek thu a sawi.

IOC hotute chuan, gas hralh rûk leh chhêk khâwl tur ven nan Mizoram hmun hrang hrangah ṭum 230 an endik tawh thu leh, gas bûr khawih chingpen 91 man a nih tawh thu an sawi a, "Hengte hi gas phurtute hnen aṭanga man a ni a, distributor lamte pawh uluk taka vil reng an ni," an ti.

RGGLV Distributors Association president Vanlalvuta Chinzah chuan, geo-politics avangin gas book theih hun siamrem a nih thu sawiin, "Khawpui (urban)-ah gas dawn aṭanga ni 25 hnuah leh thingtlang (rural)-ah ni 45 hnuah chauh book leh theih a ni a, ni 25/45 a tlin phawt loh chuan book theih a ni lo," a ti a; mi tam takin ni 25/45 ral hmaa book tumin an call vak vak avangin system a buai phah ṭhin tih sawiin, ni 25/45 a ral hma chuan book tum lo turin mipui a ngen.

Vanlalvuta chuan, West Asia-a indo a nih hmain digital booking chu 80% vel a nih laiin, buaina a awm hnuah 88% vel a nih thu a sawi a; gas consumer zinga 86% vel chu DAC kaltlanga an pek tawh thu sawiin, "14% vel chu DAC kaltlang loin pek an la ngai. Thingtlangah mobile signal thlen lohna khuate a la awm a, chungah chuan online booking an ti thei lo," a ti.

Mizoram chhunga gate hran hrangah duty zinga mi ṭhenkhatin gas phurtu lirthei aṭangin gas an lo lak ṭhen ṭhin tih sawiin RGGLV Distributors Association President chuan, lo la then tawh lo se an duh thu a sawi bawk.