KHAWTHLIR

Chawlh puang

Vawiin hi Aizawl Municipal Corporation inthlanpui vote thlak ni a nih avangin AMC huam chhunga vote neite tan Mizoram sorkar chuan chawlh (public poliday)-ah a puang a; AMC huam chhunga sorkar pisa, zirna-in leh public sector pisa zawng zawng khâr vek a ni ang.

Tomato chin zirtir

Krishi Vigyan Kendras, Khawzawl chuan nimin khan an training hall-ah Biate khuaa tomato chíng tura hma la mek chhungkua 23 pualin training an buatsaih a; senior scientist & head Dr Malsawmkimi'n kaihruaiin, thil pawimawhte a zirtir. Training-a telte hi Indian Institute of Horticulture Research scheme hnuaiah tomato chi leh thlai chi pek nghal an ni.

HSLC result

Mizoram Board of School Education chuan April 23, Ningani chhun dar 12 khian rokhawlhna a awm loh chuan High School Leaving Certifcate Examination, 2026 result tihchhuah a tum. Result hi MBSE office, Chaltlangah leh MBSE Regional office, Lunglei bakah, website www.mbse.edu.in leh www.mbseonline.com-ah te en theih a ni ang. A duh tan result bu lei tur a awm dawn bawk.

MTM-in ngaihtuah uluk turin ngen

Mizoram Transformation Movement chuan thuchhuah siamin, vawiina Aizawl Municipal Corporation inthlan turah vote nei zawng zawngte chu an thlan tur uluk taka ngaihtuah chunga vote thlak vek turin an ngen a, "Vote thlak hi kan chanvo leh khua leh tui mawhphurhna a ni," an ti. Therhlo leh sum leh paia thlêm tumtute vote lo tur te, Pathian ṭih mi, mi rinawm, ei ru ngai lo tur mi thlang turin an chah bawk.

Computer hlan

Kolasib district bawrhsap H Dolianbuaia chuan nimin khan DC conference hall-ah District Local Administration Office (DLAO) buatsaihin Kolasib district-a Hortoki-II, Phaisen leh North Chhimluang VC te hnenah computer a hlan. Computer hi Rashtriya Gram Swaraj Abhiyan hnuaia sem a ni a, Kolasib district tan he scheme hnuaiah hian kum 2025-26 atan computer 346 lei a ni.